Ghazal

"is zamaane mein paarsaa honaa jaise patthar ko aaina honaa tu jo chaahe to jaavedaan kar de varna fitrat mein hai fanaa honaa sirf banda hi mujh ko rahne de ho mubaarak tujhe khudaa honaa tapte sahraa mein koi khel nahin dil kaa gulshan haraa-bharaa honaa meraa sach bolnaa hai yaad mujhe aur us kaa charaagh-paa honaa reza-reza vujud hai meraa raas aayaa use havaa honaa apni 'aadat hai DhunDhnaa 'kaamil' us ki fitrat hai laapata honaa"

"basti-basti sahraa-sahraa ek ik jangal ham khud ko kab se DhunDh rahe hain paidal paidal ham kaale kaale saanp badan se lipTein bhi to kyaa duniyaa ko to mahkaaeinge ban kar sandal ham dariyaa chhoD ke pyaas ko apne gale lagaate hain duniyaa vaalon ko lagte hain yuun bhi paagal ham viraanon ko aksar ham ne zinat bakhshi hai tapte sahraaon par barse ban kar baadal ham nok-e-sinaan par chaDh kar jab jab goyaa hote hain paidaa kar dete hain aivaanon mein halchal ham pyaas sataae bhi kyon 'kaamil' fikr ke sahraa mein lafzon se pur kar lete hain fan ki chhaagal ham"

"na saltanat na koi apni raajdhaani hai javaan dilon pe hamaari hi hukmraani hai ye zard chehre sulagte mohabbaton ke khanDar har ek chiiz tire zulm ki nishaani hai rakhaa hai 'azmat-e-ajdaad kaa bharam aksar hamaari aankhon mein sharm-o-hayaa kaa paani hai tamaam 'umr saraabon ke shahr mein bhaTki ye zindagi hai ki laDki koi divaani hai khaDe hain donon doraahe par ik zamaana huaa tire ghurur na meri anaa kaa saani hai jahaan jale vahin aamaada sar-kashi pe huiin havaaon ki ye charaaghon se zid puraani hai bataae kyaa tumhein 'kaamil' na jaane kis ke liye fazaa-e-dil hai ki muddat se zaa'fraani hai"

"khatm jab donon taraf se bad-gumaani ho gai sabz har mausam huaa har rut suhaani ho gai aao dekhein kis ne zulfon ko bikheraa vaqt-e-shaam kyon ghaTaa chhaai fazaa kyon zaa'fraani ho gai ruThnaa phir maan jaanaa maan kar phir ruThnaa kyaa bataaun us ki ye 'aadat puraani ho gai baa'd muddat ke mile the kal anaa ke moD par ik zaraa si baat par phir aanaa-kaani ho gai saamne fōtpath hai aur be-sar-o-saamaaniyaan khatm ab ajdaad ki ik ik nishaani ho gai rafta-rafta ho gayaa maqbul main bhi shahr mein kaamyaab apne qalam ki jaan-fishaani ho gai hukm saadir kar diyaa haakim ne 'kaamil' ke khilaaf har taraf jab 'aam us ki haq-bayaani ho gai"

"sahraa ki tapti dhuup mein laayaa gayaa huun main phir mom kaa khilaunaa banaayaa gayaa huun main saanson mein kheinch di gai aavaaz ki lakir lafzon ke pairahan se sajaayaa gayaa huun main miTTi ko meri bakhsh ke aflaak kaa 'uruj phir kyon bulandiyon se giraayaa gayaa huun main lekin kabhi na past huaa meraa hausla sau baar aandhiyon mein jalaayaa gayaa huun main main tujh se duur aur na tu mujh se duur hai tu hai jahaan jahaan vahin paayaa gayaa huun main chehre pe dhuul jam gai pahchaan miT gai kaise museum mein sajaayaa gayaa huun main 'kaamil' har ik nafas miraa aahang-e-she'r hai ghazlon ki khushbuon mein basaayaa gayaa huun main"

"le kar mohabbaton ke taraane chale gae jaane kahaan vo log puraane chale gae khaamosh the to saaraa zamaana thaa saath saath goyaa hue to jism se shaane chale gae un ko barahnagi ke sivaa kuchh na mil sakaa chaadar jo khvaahishaat ki taane chale gae aankhon mein hai khumaar to bas rat-jagon kaa aaj kis samt jaane khvaab suhaane chale gae faaqon kaa bojh had se ziyaada baDhaa to bas saDkon pe bachche giit sunaane chale gae chaupaal khatm jab se hui apne gaanv ki pariyon ke dil-fareb fasaane chale gae mumkin hai 'kaamil' aaj na pahchaan paae vo us se mile bhi ab to zamaane chale gae"

"rakhtaa hai ek ek qadam yuun uThaa ke vo chaltaa ho jaise dosh pe mahki havaa ke vo tasvir apne haath pe meri banaa ke vo khud pahron dekhtaa hai use muskuraa ke vo dil maangtaa hai aur kabhi maangtaa hai jaan har rukh se dekhtaa hai mujhe aazmaa ke vo katraa rahaa hai haath milaane se is liye laayaa hai aastin mein khanjar chhupaa ke vo rusvaaiyon ke khauf se ye ehtiyaat hai miltaa hai roz mujh se magar chhup-chhupaa ke vo shaayad ki raaz khulne kaa ab us ko Dar nahin 'masrur' ho rahaa hai bahut khat jalaa ke vo 'kaamil' use zarurat-e-tegh-o-tabar nahin kartaa hai qatl barq-e-tabassum giraa ke vo"