Ghazal

"kyaa zamaane se tavaqqo rakhein achchhaai ki ye to duniyaa hai na apnon ki na harjaai ki jab se duniyaa ne mashinon se shanaasaai ki sab ki aankhon mein thakan dekhi hai tanhaai ki ik paDaav hai ghaDi-do-ghaDi dam lene ko vo giraftaar huaa jis ne shanaasaai ki mansab-o-jubba-o-dastaar pe mauquf nahin shakhsiyat asl to hai qaamat-e-zebaai ki vo to khushbu thi bikharnaa thaa muqaddar us kaa ye nasib us kaa jo gulshan ne paziraai ki jo sar-e-bazm kahaa daar pe dohraayaa vahi meri guftaar mein jurat rahi sachchaai ki ghaav bharne the jinhein le ke vo nashtar aae kis masihaa se rakhein aas masihaai ki ab kahaan sarmad-o-mansur se aashufta-mizaaj rasm farzaanon ne Daali hai shakebaai ki dekhne se kahaan khultaa hai samundar kaa mizaaj Duub kar baat khulaa karti hai gahraai ki jaantaa huun ki 'karaamat' hai mire mansab ki jo harifon ne sar-e-bazm paziraai ki"

"jidhar se tiir chalaa koi mehrbaan niklaa tavaqquaat se baDh kar vo mezbaan niklaa samar se pahle shajar kaaT kar jalaa Daale ki jald-baaz bahut ab ke baaghbaan niklaa ajiib rang huaa ab ke meri nagri kaa ki jo bhi shahr mein niklaa vo be-amaan niklaa ye kis azaab ne basti ko meri gher liyaa ki chulhe sard rahe yaan magar dhuaan niklaa savaal ye hai sabab kis se qatl kaa puchhein ki jis ne qatl kiyaa vo hi be-zabaan niklaa hamaare baad bhi kyaa zeb-e-daar hogaa koi yahi savaal miraa zeb-e-daastaan niklaa ham apni aql ko ilzaam dein ki qismat ko hamaare daur mein rahzan bhi paasbaan niklaa jabin jhuki to zamin uTh ke aajizi se mili jo sar uThaa to bahut duur aasmaan niklaa rahe hain ham to 'karaamat' gae dinon ke naqib ki ham se ahd nayaa sakht bad-gumaan niklaa"

"savaal ye hai sabab kis se qatl kaa puchhein ki jis ne qatl kiyaa vo hi be zabaan niklaa amir-e-shahr to lafzon ke jaal buntaa hai magar jo sach thaa vo fiqron ke darmiyaan niklaa hamaare baa'd bhi kyaa zeb-e-daar hogaa koi yahi savaal miraa zeb-e-daastaan niklaa ham apni aql ko ilzaam dein ki qismat ko hamaare daur mein rahzan bhi paasbaan niklaa jabin jhuki to zamin uTh ke aajizi se mili jo sar uThaa to bahut duur aasmaan niklaa rahe hain ham to 'karaamat' gae dinon ke naqib ki ham se ahd nayaa sakht bad-gumaan niklaa"

"jo dukh diye the kabhi tum ko aazmaane ko vo tiir ban ke palaT aae sab nishaane ko tumhaaraa saath na hotaa to be-amaan hote tumhaari chhaanv zaruri thi aashiyaane ko nahin hai khauf ki nichaa dikhaaegi duniyaa jo saath tum raho jaanaan mujhe uThaane ko jo main ne apni hi gudDi mein khud ujaale hain vahi hain laal bahut zindagi sajaane ko zaruri hai ki rahe taazgi mohabbat mein rifaaqatein na rahin vaada ab nibhaane ko jo tinke tinke jama kar ke aashiyaana bane bas ek barq hai kaafi use jalaane ko maqaam-e-azmat-e-aadam samajh mein aane lagaa farishte chumne aate hain aastaane ko hamaare baa'd bhi mahkaa karegi bazm-e-tarab agarche umr lagegi hamein bhulaane ko rahegi zinda mire baa'd daastaan meri paDheinge log hamesha mire fasaane ko 'karaamat' un ko zamaana salaam kartaa hai jo nok-e-paa pe hi rakhte hain is zamaane ko"

"bahut thakaan badan mein mire safar ki rahi magar vo shauq ki manzil ki har nagar ki rahi vo jis pe chal ke sadaa paanv zakhm zakhm hue na jaane khoj hamein kyon usi Dagar ki rahi jo meri zaat ki pinhaaiyaan samajh leti tamaam umr zarurat usi nazar ki rahi jab apne aap mein Duube falak ko chhu aae ki ehtiyaaj hamein ab na baal-o-par ki rahi hamin se sunnat-e-mansur ab bhi zinda hai ki har zamaane ko haajat hamaare sar ki rahi bilaa-sabab to 'karaamat' pe apni naaz nahin ki chaar-daang mein shohrat mire asar ki rahi"

"navaa-e-saaz bantaa jaa rahaa huun bas ik aavaaz bantaa jaa rahaa huun rafiq ab koi bhi meraa nahin hai main khud dam-saaz bantaa jaa rahaa huun zamaana jo bhi karvaT le rahaa ho vahi andaaz bantaa jaa rahaa huun mizaaj-e-vaqt ko samjhaa hai jab se zamaana-saaz bantaa jaa rahaa huun main apni zaat mein gum ho gayaa huun muammaa raaz bantaa jaa rahaa huun jo baal-o-par sab apne kho chukaa ho main aisaa baaz bantaa jaa rahaa huun khudaa ne jab khalifa kah diyaa to main us kaa naaz bantaa jaa rahaa huun 'karaamat' huun yahi kuchh kam nahin hai karaamat-saaz bantaa jaa rahaa huun"

"ghazlein bhi bahut likkhin aur giit bahut gaae ham sher ki azmat ko lekin na pahunch paae kuchh aisaa anokhaa bhi andaaz na thaa apnaa kuchh log magar phir bhi ham ko na samajh paae ham dil ki amiri se is darja tavangar the jo khaak mili ham ko ham sonaa banaa laae miTTi mere kheton ki hathiyaa li asiron ne aur jitne gharaunde the yaaron ne mire Dhaae rahzan se bachaa laae sab maal-o-mataa' apni ghar luuT gae lekin jo the mire hamsaae ham ahl-e-hunar ab to is haal pe qaane hain nai dhuup hai aariz ki nai gesuon ke saae vo ahd-e-javaani jo is shahr mein kaaTaa thaa ai kaash kabhi vo bhi ik roz palaT aae ye aag mire ghar mein hai apne charaaghon ki dushman ko zarurat kyaa chingaari vo bhaDkaae dushman kaa nasib ab to ye apni karaamat hai dahliz pe us ki ham neamat ye luTaa aae"

"bikhar bikhar ke jo simTi vo kaaenaat huun main miraa sabaat yahi hai ki be-sabaat huun main khudaa to bhuul gayaa kab kaa khalq kar ke mujhe sahar bhi chhoD gai jis ko aisi raat huun main mire nafas mein hai pinhaan jo meraa khaaliq hai varaq varaq jo mukammal hai vo kitaab huun main main apni zaat mein yaktaa nahin huun duniyaa mein jo sab pe biit rahi hai vo vaardaat huun main mujhe ye ilm nahin qaafila ravaan hai kahaan magar sharik-e-gham-e-jaada-e-hayaat huun main"