Ghazal

"dhokaa bhi nahin thaa koi unvaan bhi nahin thaa aise mein jiye jaane kaa imkaan bhi nahin thaa kyaa jaaniye kyaa soch ke vaan Duub gae ham dariyaa mein to is dam kahin tufaan bhi nahin thaa aabaad saraabon se sadaa is kaa jahaan thaa sahraa mire dil saa kabhi viraan bhi nahin thaa ik baat thi ye ham use sochein ki na sochein haan is ke sivaa masala-e-jaan bhi nahin thaa ye jaan ke vo raqs kiyaa ahl-e-junun ne jo haath lagaa un ke garebaan bhi nahin thaa har saans nikalti hai tiri yaad mein Duubi aur bhuul ke jiinaa tujhe aasaan bhi nahin thaa kuchh phuul shagufta mire honTon pe saje hain aaina mujhe dekh ke hairaan bhi nahin thaa phulon ke lahu se ye chaman-zaar thaa raushan gulshan mein kahin khaar-e-mughilaan bhi nahin thaa hai baat baDi jaan miri kaam to aai vo qatl mujhe kar ke pashemaan bhi nahin thaa in mast nigaahon ke ishaaron ko samajhnaa mushkil bhi nahin thaa koi aasaan bhi nahin thaa duniyaa ye bhalaa kyuun mire qadmon mein paDi hai main is ke liye itnaa pareshaan bhi nahin thaa palkon ko sikhaa dete rah-o-rasm bhi 'khaalid' thi hijr ki shab aur charaaghaan bhi nahin thaa"

"na vo dard hai na vo ranj hai na hujum zulmat-e-shaam hai mire khushk honTon pe yak-ba-yak jo chamak uThaa tiraa naam hai kabhi kahkashaan se guzar gae kabhi bazm-e-gul mein utar gae jo samajh gae to Thahar gae tiraa dar hi apnaa maqaam hai mire gham hain kitne ajiib se vo milaa kahaan hai nasib se yahaan qurb ki mujhe aarzu vahaan duur hi se salaam hai jo chhupaa ke pyaason se main piyun jo kisi ke haath se chhin luun to vo pyaas mujh se gunaah hai to vo jaam mujh pe haraam hai suno sar-phiro mire haasido miri zindagi kaa hai raaz kyaa miraa sar kahin bhi jhuke to kyuun miraa dil kisi kaa ghulaam hai hamein thi khabar ye to peshtar ki hai aastin mein chhupi chhuri mile phir gale yahi soch kar chalo lab pe is ke to raam hai main vahi huun 'khaalid'-e-naa-rasaa mujhe jaantaa hai ye mai-kada miraa jaam jaam mein aks hai miraa buund buund mein naam hai"

"shokh-o-gustaakh jab andaaz-e-sabaa hotaa hai tab kahin jaa ke hasin rang-e-qabaa hotaa hai rang bharne ki hain baatein sabhi afsaane mein ishq mein kaun bhalaa kis se judaa hotaa hai jab dahakte hue honTon kaa tasavvur ubhre dil mein soyaa huaa har zakhm haraa hotaa hai us se kyaa kahiye sar-e-raah koi baat kabhi gar main mil jaaun mujhe DhunD rahaa hotaa hai ilm vaalo ye zaraa paDh ke bataao mujh ko kyaa rukh-e-gul pe ye shabnam se likhaa hotaa hai phir khataa puchh li tum ne to sazaa se pahle aisi baaton se hi 'khaalid' vo khafaa hotaa hai"

"na kami koi tire naaz mein na kami hai zauq-e-niyaaz mein to vafaaein meri hi pesh kar mire khun-e-dil ke javaaz mein miri khaak mein tiri saans hai tiri raushni mire paas hai mujhe dil diyaa sanam-aashnaa miraa sar jhukaa hai namaaz mein kabhi khat ko tere chhupaa liyaa kabhi ashk aae to pi liye miri zindagi to guzar gai isi parda-daari-e-raaz mein kisi ghaznavi ke nasib mein kahaan vo uruj-e-niyaaz thaa kai ghaznavi the juDe hue isi ik libaas-e-ayaaz mein hain tire sivaa bhi bahut hasin mujhe to nazar se giraa nahin usi aasmaan ke saae mein usi khaak-daan-e-majaaz mein na yuun fakhr kar na yuun sar uThaa ki ye sach hai 'khaalid'-e-be-navaa tu ye soch le tu ye jaan le ki nasheb bhi hain faraaz mein"

"mujh ko yuun mujh se milaa de koi main sadaa duun to sadaa de koi main ne puchhaa to hai anjaam-e-vafaa ab ye Dar hai na bataa de koi aarzu ye hai ki khushbu apni meri saanson mein basaa de koi us ke rukhsaar-e-shafaq-gun ki chamak mere honTon pe sajaa de koi jo jafaa pyaar se tu ne ki hai us ko kyuun kar na bhalaa de koi khun-e-dil se jo likhaa hai main ne kaash ashkon se miTaa de koi nazrein phir us ko uThaa bhi na sakein khud ko itnaa na giraa de koi ishq mein baandh ke paimaan-e-vafaa mujh ko jiine ki duaa de koi samjhein ham zahr-e-tamannaa us ko apni aankhon se pilaa de koi aas hi TuuT na jaae khaalid jab davaa de na duaa de koi"

"zindagi khatm bhi hone pe kasak baaqi hai ujDe ghar mein tiri saanson ki mahak baaqi hai mere hamdam mujhe bedaad se mahrum na kar daaman-e-ruh mein zakhmon ki tapak baaqi hai mujh ko do chaar ghaDi aur bhi jiine diije siskiyon ki abhi zakhmon mein sanak baaqi hai aas ki shama pighalne ko hai ab to aa jaa raat baaqi hai sitaaron mein chamak baaqi hai main kisi vaada-faraamosh kaa aaina huun meri aankhon mein abhi us ki jhalak baaqi hai dil-e-zakhmi liye baiThaa huun azizaan-e-kiraam aao kuchh aur chhiDak do jo namak baaqi hai"

"mohabbat ki alaamat ho gai hai ye kis be-kas ki rehlat ho gai hai koi maqsad nahin hai zindagi kaa hamein jiine ki aadat ho gai hai abhi tak kyuun ye patte TuTte hain havaa to kab ki rukhsat ho gai hai koi taaqat dabaa sakti nahin ab ki zehnon mein baghaavat ho gai hai jise main qatl kar ke khush huaa thaa har aaina vo surat ho gai hai garebaan mein abas kyuun jhaankte ho tumhein kaisi ye vahshat ho gai hai ibaadat ik zarurat se thi pahle zarurat ab ibaadat ho gai hai nahin hai dhyaan apni zindagi kaa ki ab bachchon se ulfat ho gai hai hamaari zindagi hi kyaa hai 'khaalid' azizon ki amaanat ho gai hai"