Ghazal

"har ghaDi barse hai baadal mujh mein kaun hai pyaas se paagal mujh mein tum ne ro-dho ke tasalli kar li phailtaa hai abhi kaajal mujh mein main adhuraa saa huun us ke andar aur vo shakhs mukammal mujh mein chup ki divaaron se sar phoDe hai jo ik aavaaz hai paagal mujh mein main tujhe sahl bahut lagtaa huun tu kabhi chaar qadam chal mujh mein muzhda aankhon ko ki phir se phuTi ik nae khvaab ki konpal mujh mein kaaTne hain kai ban-baas yahin ug rahaa hai jo ye jangal mujh mein aag mein jaltaa huun jab jab 'athar' aur aa jaataa hai kuchh bal mujh mein"

"rok rakkhaa thaa jo in aankhon mein khaaraa paani meri divaaron mein dar aayaa vo saaraa paani ek dariyaa ko dikhaai thi kabhi pyaas apni phir nahin maangaa kabhi main ne dobaaraa paani apni aankhon se nichoDungaa kisi roz use kartaa rahtaa hai bahut mujh se kinaaraa paani ab ke baarish pe koi haq nahin insaanon kaa ab ke chiDiyon ke liye rab ne utaaraa paani main samundar se lagi shor-zamin jaisaa huun maartaa rahtaa hai mujh ko miraa khaaraa paani main ne in aankhon se kuchh moti chune the 'athar' mere honTon mein abhi jazb hai khaaraa paani"

"DhunDhtaa hai koi rastaa mire aaine mein qaid jo shakhs hai mujh saa mire aaine mein khinch le tujh ko na aaine ke andar kaa tilism ghaur se dekh na itnaa mire aaine mein us ke jaisaa huun main aaine ke baahar koi rah rahaa hai vo jo mujh saa mire aaine mein main hi aaina-e-duniyaa mein chalaa aayaa huun yaa chali aai hai duniyaa mire aaine mein aks kuchh aur nazar aataa hai meraa sab ko kis ne ab tak mujhe dekhaa mire aaine mein ru-ba-ru hotaa hai ik shakhs bhi mujh saa 'athar' main akelaa nahin hotaa mire aaine mein"

"tamaam galiyon mein maatam bapaa thaa jangal kaa yahaan zarur koi silsila thaa jangal kaa likhi thiin vahshatein sahraa ki meri aankhon mein kitaab-e-dil mein varaq khul rahaa thaa jangal kaa hamaare shahron mein ab roz hotaa rahtaa hai vo vaaqia jo kabhi vaaqia thaa jangal kaa vo is taraf ki pahaaDi pe miThe jharne the pa darmiyaan mein rasta ghanaa thaa jangal kaa mujh ek shahr mein aisaa bhi thaa udaas koi hamesha mujh se pata puchhtaa thaa jangal kaa kisi ke saath ne insaan banaa diyaa hai ise vagarna dil ye kabhi bheDiyaa thaa jangal kaa jahaan pe khatm thi insaaniyat ki had 'athar' vahaan pe dekhaa to ik raasta thaa jangal kaa"

"main apne jism ki divaar mein chunun khud ko phir apne-aap se baatein karun sunun khud ko tamaam shahr mein bikhraa paDaa hai meraa vajud koi bataae bhalaa kis tarah chunun khud ko nikal paDaa huun main ham-zaad DhunDne apnaa lagaa ke baiThaa huaa huun ajab junun khud ko mire vajud ke sab taane-baane uljhe hain kidhar kidhar se main suljhaaun aur banun khud ko vo chiiz kyaa hai ki jis ki talaash mein 'athar' udheD udheD ke apnaa badan dhunon khud ko"

"koi bagula raqsaan mere andar hai dil-sahraa mein jashn ke jaisaa manzar hai main ne kaise kaise moti DhunDe hain lekin tere aage sab kuchh patthar hai balcony par aao meri palkon ki dekho kitnaa gahraa niilaa samundar hai khaamoshi se maar na de ik din mujh ko shor saa ik jo meri zaat ke andar hai chaahe jo bhi khiDki mein kholun 'athar' sab ke baahar ek hi jaisaa manzar hai"

"tu bhi ho jaaegaa paani paani pyaas hai meri puraani paani rah ke sahraa mein haraa ho gayaa main mujh mein bahne lagaa dhaani paani kahti jaati hai kahaani koi teri har aan ravaani paani tu to rahtaa hai miri aankhon mein tujh se kyaa baat chhupaani paani pyaas roke hue main baiThaa thaa aur phir chikh uThaa paani paani main ne khinchaa thaa havaa par koi lafz likhtaa hai jis ke maaani paani meri aankhon se bhi ik baar nikal dekhun main teri ravaani paani halq se zahr utaarun 'athar' laa mire dushman-e-jaani paani"

"harim-e-dil mein Thahar yaa saraa-e-jaan mein ruk ye sab makaan hain tere kisi makaan mein ruk abhi main joD rahaa huun yaqin kaa pyaala tu aisaa kar ki abhi kaasa-e-gumaan mein ruk main tujh ko baandh luun apni ghazal ke sheron mein khayaal-e-yaar zaraa der mere dhyaan mein ruk bahut si qaus-e-quzah ban rahi hain aankhon mein ai haft-rang pari meri daastaan mein ruk main apne sheron kaa meaar kuchh buland karun mire huruf mein zam ho miri zabaan mein ruk"

"raas aati hai bahut aab-o-havaa sahraa ki jaane de di hai tujhe kis ne duaa sahraa ki tujh ko milne se rahaa shahr mein vahshat kaa ilaaj tujh ko shaayad ki shifaa bakhshe havaa sahraa ki ham to lete hain mazaa ghar mein hi viraani kaa naaz-bardaari kare kaun bhalaa sahraa ki ik samundar hai miri zaat ke paimaane mein Daal rakkhi hai magar us pe ridaa sahraa ki teraa ham-zaad tujhe shahr mein milne se rahaa baandh le rakht-e-safar khaak uDaa sahraa ki"

"kyaa khabar jo nazar aataa hai vo manzar hi na ho ye samundar kahin sach-much mein samundar hi na ho jis ki ummid pe sar phoD rahi hai duniyaa kahin is aahani divaar mein vo dar hi na ho jaan kar phuul jise dil se lagaae hue hain ghaur se dekh lein chhu kar use patthar hi na ho dar-o-divaar se ye kaise nazar aate hain jis ko viraana samajh baiThe hain vo ghar hi na ho is qadar ham ko Daraanaa nahin achchhaa 'athar' kyaa pata ham ko kisi chiiz kaa phir Dar hi na ho"

"koi dariyaa bhi ravaan hai mujh mein sirf sahraa hi kahaan hai mujh mein kyaa pataa jaane kahaan aag lagi har taraf sirf dhuaan hai mujh mein jashn hotaa hai vahaan raat Dhale vo jo ik khaali makaan hai mujh mein ajnabi ho gaiin galiyaan meri jaane ab kaun kahaan hai mujh mein ek din thaa jo kahin Duub gayaa ek shab hai ki javaan hai mujh mein tum jise DhunD rahe ho 'athar' ab vo insaan kahaan hai mujh mein"

"khud apne qatl kaa ilzaam Dho rahaa huun abhi main apni laash pe sar rakh ke ro rahaa huun abhi usi pe fasl khaDi hogi ik sadaaon ki main jis zamin pe khaamoshi bo rahaa huun abhi sab apni apni fasilein haTaa lein raste se main apni raah ki divaar ho rahaa huun abhi kaho ki dasht abhi thoDaa intizaar kare main apne paaon nadi mein bhigo rahaa huun abhi main tujh ko pheink bhi saktaa thaa zindagi lekin kisi umiid pe ye bojh Dho rahaa huun abhi bahut si aankhein miri raah dekhti hongi main ek khvaab huun taabir ho rahaa huun abhi"

"ye kaisi aag mujh mein jal rahi hai ye kaisi barf mujh mein gal rahi hai koi tasbih mujh mein paDh rahaa hai koi qindil mujh mein jal rahi hai musaafir jaa chukaa lambe safar par abhi tak dhuup aankhein mal rahi hai sabhi baahon ko phailaae khaDe hain qayaamat hai ki har-pal Tal rahi hai izaafi ho chukaa hai matn saaraa kahaani haashiye se chal rahi hai mujhe sab dafn kar ke jaa chuke hain magar ye saans ab tak chal rahi hai bahut roegi ye laDki kisi din jo mere saath hans kar chal rahi hai"

"ham to hain hasrat-e-didaar ke maare hue log yaani ik nargis-e-bimaar ke maare hue log jal gae dhuup mein jo un kaa shumaar ek taraf kam nahin saaya-e-divaar ke maare hue log tu ne ai vaqt palaT kar bhi kabhi dekhaa hai kaise hain sab tiri raftaar ke maare hue log dekhte rahte hain khud apnaa tamaashaa din raat ham hain khud apne hi kirdaar ke maare hue log roz hi khalq-e-khudaa marti hai yaa dobaara zinda ho jaate hain akhbaar ke maare hue log teri dahliz pe iqraar ki ummid liye phir khaDe hain tire inkaar ke maare hue log"