Ghazal

"vafaa khulus-o-mohabbat ki baat kartaa huun adab ke saath sharaafat ki baat kartaa huun maaashre kaa hai aaina shaaeri meri main lafz lafz sadaaqat ki baat kartaa huun"

"raushni chaaho to mehr-o-mah-o-akhtar socho ek qatre ki talab ho to samundar socho kaise ki jaae rafu amn ki chaadar socho sochne vaalo zaraa socho mukarrar socho jis kaa saaya hai tabaahi ki alaamat ai dost us parinde ke katar paaoge kyaa par socho sim-o-zar ke liye imaan luTaane vaalo saath kyaa le ke gayaa apne sikandar socho kaise duniyaa ko mayassar hon ukhuvvat ke samar nakhl ulfat kaa ho kis tarah tanaavar socho jis se aati thi khulus aur vafaa ki khushbu kaise paamaal huaa hai vo gul-e-tar socho apne akhlaaq se maghlub karo dushman ko tiir socho na tabar socho na khanjar socho jis ne har gaam pe duniyaa ko masarrat di hai aaj kyunkar hai shikan us ki jabin par socho jis ki peshaani pe manzil kaa pata likkhaa hai Thokarein kis liye khaataa hai vo patthar socho apni ghazlon kaa baDhaane ke liye husn 'shafia' fikr paakiza rakho lafz munavvar socho"

"khud ko fareb-o-makr-o-daghaa ke khilaaf rakh dil apnaa aaine ki tarah paak-saaf rakh mujh ko haqiqaton ki fazaaon mein uDne de tu apne paas tazkira-e-koh-e-qaaf rakh iqraar jis ki zaat kaa roz-e-azal kiyaa us ki zamin par na but-e-inhiraaf rakh shamshir ke baghair kisi kaam kaa nahin naadaan apne saath na khaali ghilaaf rakh maashuq-e-jaavedaan ko rijhaane ke vaaste kapDon se baDh ke qalb-o-jigar paak-saaf rakh TukDe dikhaai degaa tujhe chehra-e-nashaat tu dil ke aaine mein na koi shigaaf rakh sheva hai teraa haq ki himaayat kaa ai 'shafia' jo haq nahin tu us se sadaa ikhtilaaf rakh"

"mahal-saraaon ke divaar-o-dar se kyaa lenaa tire gadaaon ko laal-o-guhar se kyaa lenaa main apne zarf ko apni nazar se dekhungaa kisi ki fikr kisi ki nazar se kyaa lenaa jo baal-o-par ke sahaare uDe parinda hai main aadmi huun mujhe baal-o-par se kyaa lenaa main khud bashar huun bashar se hai dosti meri mujhe tasavvur-e-fauq-ul-bashar se kyaa lenaa jo chal sako to chalo mere saath manzil tak vagarna mujh ko tumhaare safar se kyaa lenaa ik aadmi ko bhi insaan jo banaa na sake muaaf karnaa mujhe us hunar se kyaa lenaa mujhe zamin ke zarron mein nuur bharnaa hai miri talaash ko shams-o-qamar se kyaa lenaa use to dhuup ki chaukhaT se lauT jaanaa hai nasim-e-subh ko phir dopahar se kyaa lenaa hai kaun bhukaa andheraa hai kis ke ghar mein 'shafia' amir-e-shahr ko aisi khabar se kyaa lenaa"

"jazba-e-shauq ko bedaar karun yaa na karun tu bataa de main tujhe pyaar karun yaa na karun hasraton ko gul-o-gulzaar karun yaa na karun tere jalvon kaa main didaar karun yaa na karun main jalaaun na jalaaun tiri yaadon ke charaagh dil ki basti ko pur-anvaar karun yaa na karun jis ki shiddat se taDapne mein mazaa aataa hai dil ko us dard se do-chaar karun yaa na karun mere dil tu hi bataa soch samajh kar mujh ko apni chaahat kaa main izhaar karun yaa na karun"

"tark-e-vafaa kaa shikva mat kar ulfat kaa iqraar na maang ghair to aakhir ghair hai us se apnon jaisaa pyaar na maang baatil ke parvaanon se haq-goi ki ummid na kar patthar dil rakhne vaalon se hamdardi ke haar na maang maan ke duudh kaa qarz chukaanaa hai to paDhne jaa schōl nanhe nanhe in haathon mein thaam qalam talvaar na maang pyaar ke sachche phulon ko mahkaane ki tadbirein kar jin mein nafrat ke phal aate hon aise ashjaar na maang chhoTi chhoTi baaton par yuun barham honaa Thiik nahin mujh se apne pyaar kaa tohfa vaapas mere yaar na maang main teraa chhoTaa bhaai huun chaahe ye taslim na kar lekin is ghar ke aangan mein nafrat ki divaar na maang apni mahrumi ke ehsaasaat rulaa bhi sakte hain is ke daaman mein kaanTe hi kaanTe hain gulzaar na maang main bhi apni lakht-e-jigar ke saare qarz adaa kar duun tu bhi apne beTe ki shaadi mein motor car na maang khvaabon ki duniyaa mein pal do pal rahnaa hi achchhaa hai saari umr basar karne ko sapnon kaa sansaar na maang paakiza fikron ke zevar jin ke tan ki zinat hain fan ki un do-shizaaon se uryaani zinhaar na maang duniyaa bhar ki jhuTi khabrein din bhar tu paDh saktaa hai shaam savere quraan paDh le angrezi akhbaar na maang jis se teraa naam ho raushan khud kar aise kaam 'shafia' jhuTi shohrat ki khaatir kam-zarfon se dastaar na maang"

"gul-badan gul-pairahan ruh-e-chaman tum hi to ho jaan-e-man ghuncha-dahan shirin-sukhan tum hi to ho gulshan-e-hasti ki raanaai tumhaare dam se hai nargis-o-nasrin gulaab-o-yaasman tum hi to ho meri izzat meri zillat sab tumhaare haath hai main barahna jism meraa pairahan tum hi to ho jis ko paane ke liye ahl-e-khirad tarsaa kiye meraa vo sarmaaya vo divaana-pan tum hi to ho koi samjhe yaa na samjhe main samajhtaa huun zarur zindagi tum hi to ho daar-o-rasan tum hi to ho saari duniyaa ki bahaarein jis ke chehre par nisaar jis pe qurbaan do-jahaan kaa baankpan tum hi to ho main tumhaare ishq mein kaafir se momin ban gayaa meri nazron mein hidaayat ki kiran tum hi to ho kar diyaa jis ne mujhe ahd-e-vafaa se aashnaa jis ne bakhshi pyaar ki miThi chubhan tum hi to ho raat ki taarikiyon ko jis ne bakhshi raushni chaand taaron ki vo dilkash anjuman tum hi to ho bhuul jaataa huun main jis ko dekh kar har gham 'shafia' mere armaanon kaa vo zarrin gagan tum hi to ho"