Ghazal

"naam hi rah gayaa ik anjuman-aaraai kaa chhup gayaa chaand bhi ab to shab-e-tanhaai kaa dil se jaati nahin Thahre hue qadmon ki sadaa aankh ne svaang rachaa rakkhaa hai binaai kaa ek ik yaad ko aahon se jalaataa jaaun kaam saunpaa hai ajab us ne masihaai kaa ab na vo lams nigaahon kaa na khushbu ki sadaa dil ne dekhaa thaa magar khvaab shanaasaai kaa saaat-e-dard farozaan hai bahaa lein aansu TuTne ko hai kaDaa vaqt shakebaai kaa"

"main ek andhe kuein kaa qaidi kise milungaa kahaan mujhe DhunDhne chali hai najaat meri khajaalat-e-darguzar se lab par duaa na Thahri dar-e-samaaat se lauT aai hai raat meri main kis ke qaul o qaraar se apne ashk pochhun mukar gai hai khud apne vaadon se zaat meri hai tishnagi kaa nayaa hi ik zaaiqa labon par saraab andar saraab gardaan hayaat meri tanaab-e-khema ke TuTne tak qayaam meraa ki shaakh-e-aahu pe aaj bhi hai baraat meri"

"subhein kaisi aag lagaane vaali thiin shaamein kaisi dhuaan uThaane vaali thiin kaisaa athaah samundar thaa vo khayaalon kaa maujein kitnaa shor machaane vaali thiin darvaaze sab dil mein aa kar khilte the divaarein chehron ko dikhaane vaali thiin raston mein zinda thi aahaT qadmon ki galiyaan kyaa khushbu mahkaane vaali thiin barsaatein zakhmon ko haraa kar deti thiin aur havaaein phuul khilaane vaali thiin kaisi viraani ab in pe barasti hai ye aankhein to diye jalaane vaali thiin in baaton se dil kaa khazaana khaali hai vo baatein jo agle zamaane vaali thiin"

"nigaahon se nikal kar jo gae hain vo chehre aainon mein kho gae hain zamin par nuur ki baarish thi jin se sitaare aasmaan mein bo gae hain khile the jo chaman mein gul ki surat sabaa ke saath rukhsat ho gae hain jalaane vaale yaadon ke diye ab charaagh-e-jaan bujhaa kar so gae hain"

"azaab ho gai zanjir-e-dast-o-paa mujh ko jo ho sake to kahin daar pe chaDhaa mujh ko taras gayaa huun main suraj ki raushni ke liye vo di hai saaya-e-divaar ne sazaa mujh ko jo dekhe to isi se hai zindagi mere magar miTaa bhi rahi hai yahi havaa mujh ko usi nazar ne mujhe toD kar bikher diyaa usi nazar ne banaayaa thaa aaina mujh ko saraab-e-umr-e-tamannaa ki tishnagi huun main agar hai chashma-e-faiyaaz to bujhaa mujh ko kabhi to apne badan ke charaagh raushan kar kabhi to apne lahu se bhi aazmaa mujh ko"

"yuun lagtaa hai sab kuchh khone aayaa thaa main is ghar mein tujh ko rone aayaa thaa tu mere hamraah to aayaa thaa lekin tanhaai ke kaanTe bone aayaa thaa main us ke didaar se kab sairaab huaa vo to bas daaman ko bhigone aayaa thaa main taktaa thaa us ko pyaase honTon se baadal meri naav Dubone aayaa thaa gahri niind se mujh ko jagaa kar chhoD gayaa khvaab miri aankhon mein sone aayaa thaa"

"tapte sahraa mein ye khushbu saath kahaan se aai zikr zamaane kaa thaa teri baat kahaan se aai jalti dhuup ke lashkar ke kheme kis ne toD diye jhilmil karte taaron ki baaraat kahaan se aai biite lamhe lauTe bhi to yaad bane yaa khvaab parchhaain thi parchhaain phir baat kahaan se aai chaand abhi to niklaa hi thaa kaise Duub gayaa mere aangan mein ye kaali raat kahaan se aai"

"girnaa nahin hai aur sambhalnaa nahin hai ab baiThe hain rahguzaar pe chalnaa nahin hai ab pichhlaa pahar hai shab kaa savere ki khair ho bujhte hue charaagh hain jalnaa nahin hai ab hai aastin se kaam na daaman se kuchh gharaz patthar bane hue hain pighalnaa nahin hai ab manzar Thahar gayaa hai koi dil mein aan kar duniyaa ke saath us ko badalnaa nahin hai ab lab-aashnaa-e-harf-e-tabassum nahin rahe dil ke lahu ko ashk mein Dhalnaa nahin hai ab"

"kyaa koi dard dil ke muqaabil nahin rahaa yaa ek dil bhi dard ke qaabil nahin rahaa un ke lahu ki dahr mein arzaaniyaan na puchh jin kaa gavaah daaman-e-qaatil nahin rahaa apni talaash hai hamein aankhon ke shahr mein aaina jab se apne muqaabil nahin rahaa sargarmi-e-hayaat hai be-maqsad-e-hayaat sab rah-navard-e-shauq hain mahmil nahin rahaa us kaa khayaal aataa hai apne khayaal se ab vo bhi apni yaad mein shaamil nahin rahaa"

"dil ki lagi rah jaaegi koi kami rah jaaegi shoale to bujh jaaeinge aag dabi rah jaaegi sukhe patte bikhreinge shaakh hari rah jaaegi aaine kho jaaeinge hairaani rah jaaegi darvaaze chup saadheinge aahaT si rah jaaegi dard ke phaile saayon mein tanhaai rah jaaegi vaqt Thahar saa jaaegaa raat aadhi rah jaaegi"

"chhupaa rakkhaa thaa yuun khud ko kamaal meraa thaa kisi pe khul nahin paayaa jo haal meraa thaa har ek paa-e-shikasta mein thi miri zanjir har ek dast-e-talab mein savaal meraa thaa main reza reza bikhartaa chalaa gayaa khud hi ki apne aap se bachnaa muhaal meraa thaa har ek samt se sang-e-sadaa ki baarish thi main chup rahaa ki yahi kuchh maaal meraa thaa tiraa khayaal thaa taaza havaa ke jhonke mein jo gard uD ke gai hai malaal meraa thaa main ro paDaa huun 'tabassum' siyaah raaton mein ghurub-e-maah mein shaayad zavaal meraa thaa"

"yahaan se Duub kar jaanaa hai mujh ko samundar mein utar jaanaa hai mujh ko abhi to ku-ba-ku hai khaak meri abhi to dar-ba-dar jaanaa hai mujh ko kabhi jaate hue lambe safar par achaanak hi Thahar jaanaa hai mujh ko ye hasrat hai kahun main doston se hui ab shaam ghar jaanaa hai mujh ko tujhe apnaa sabhi kuchh saunpnaa hai tire daaman mein bhar jaanaa hai mujh ko"