Ghazal

"vo aazmaaein mujhe un ko aazmaaun main phir aandhiyon ke liye ik diyaa jalaaun main phir apni yaad ki purvaaiyaan bhi qaid kare vo chaahtaa hai agar us ko bhuul jaaun main udaas aankhon ko saughaat de ke ashkon ki ye us ne khuub kahaa hai ki muskuraaun main miyaan ye ziist ki sachchaaiyon ke qisse hain koi fasaana nahin hai jise sunaaun main fasaad, qatl, taassub, fareb, makkaari safed-poshon ki baatein hain kyaa bataaun main isi ko kahte hain mearaaj kyaa mohabbat ki vo yaad aae to phir khud ko bhuul jaaun main jamaal-e-yaar pe ghazlein to ho chuki hain bahut ye sochtaa huun use aaina dikhaaun main"

"silsila lafzon ki saughaat kaa bhi TuuT gayaa raabta khat se mulaaqaat kaa bhi TuuT gayaa maan ki aaghosh mein ulfat ki ravaani paa kar baandh Thahre hue jazbaat kaa bhi TuuT gayaa ehtiraam apne buzurgon kaa adab chhoTon kaa ab chalan aisi rivaayaat kaa bhi TuuT gayaa raat ke maathe pe suraj ne sahar likh di hai aasraa us se mulaaqaat kaa bhi TuuT gayaa aa gayaa kaise vo ab apni anaa se baahar kyaa hisaar aaj miri zaat kaa bhi TuuT gayaa aaj akhbaar ki khabrein bhi hain mashkuk 'faraaz' aaina surat-e-haalaat kaa bhi TuuT gayaa"

"is qadar sachchaai se bezaar duniyaa ho gai zad pe gardan hai miri, talvaar duniyaa ho gai us ke dil mein niim goli, shahd baaton mein rakhe puchhte kyaa ho miyaan! makkaar duniyaa ho gai be-hayaai bevafaai be-yaqini be-hisi kaise kaise khanjaron ki dhaar duniyaa ho gai maslahat ne kis qadar tabdil us ko kar diyaa ghair main huun in dinon gham-khvaar duniyaa ho gai kyaa samajhte ho yaqin kar legi tum kuchh bhi kaho soch kar denaa bayaan hoshyaar duniyaa ho gai kyaa sahaafi kyaa muarrikh kaise aalim kyaa adiib dekhte hi dekhte baazaar duniyaa ho gai haar kar jis ne kiyaa hai us se samjhautaa 'faraaz' haan usi ke vaaste hamvaar duniyaa ho gai"

"badan ki qaid se baahar Thikaanaa chaahtaa hai ajiib dil hai kahin aur jaanaa chaahtaa hai abhi dikhaao na tasvir-e-zindagi is ko ye bachpanaa hai abhi muskuraanaa chaahtaa hai har ek rut nahin bhaati hamaari aankhon ko hamaaraa khvaab bhi mausam suhaanaa chaahtaa hai ghuTan ho dil mein to phir shaaeri nahin hoti ghazal kaa sher fazaa shaairaana chaahtaa hai tire baghair bhi zinda huun dekh le ai dost ab aur kyaa tu mujhe aazmaanaa chaahtaa hai main in amiron ki aankhon mein yuun khaTaktaa huun ki mujh gharib ko saaraa zamaana chaahtaa hai main jaan nisaar karun us pe chaahtaa huun magar vo aasmaan se sitaare mangaanaa chaahtaa hai in aandhiyon ko yahi khauf khaae jaataa hai 'faraaz' phir se diyaa ik jalaanaa chaahtaa hai"

"pataa chalaa ki miri zindagi mein likkhaa thaa vo jis kaa naam kabhi Diary mein likkhaa thaa vo kis qabile se hai kaun se gharaane se sab us ke lahje ki shaaistagi mein likkhaa thaa nazar mein aae bahut se saje bane chehre magar jo husn tiri saadgi mein likkhaa thaa vo mujh gharib ki haalat pe aur kyaa kahtaa tamaam zahr to us ki hansi mein likkhaa thaa gae dinon ki kahaani hai jab raison kaa vaqaar chaal ki aahistagi mein likkhaa thaa 'faraaz' DhunD rahe ho vafaaon ki khushbu ye zaaiqa kisi guzri sadi mein likkhaa thaa"

"umr guzri isi maidaan ko sar karne mein jo makaan ham ko milaa thaa use ghar karne mein ishq aasaan kahaan umr guzar jaati hai apni jaanib kisi ghaafil ki nazar karne mein aazmaaish se to be-chaari ghazal bhi guzri ik shahanshaah bahaadur ko zafar karne mein subh ke baad bhi kuchh logon ki nindein na khulin aur ham TuuT gae shab ko sahar karne mein laakh dushvaar ho dil ko to sukun miltaa hai zindagi apne tariqe se basar karne mein rang laaeingi tamannaaein zaraa sabr karo vaqt lagtaa hai duaaon ko asar karne mein"

"mashaqqat ki tapish mein jism kaa lohaa galaate hain baDi mushkil se is miTTi ko ham sonaa banaate hain taraste hain kahin kuchh log roTi ke nivaalon ko kahin har shaam shahzaade sharaabon mein nahaate hain kabhi sukhe hue peDon kaa vo maatam nahin karte hon jin ke zehn taamiri nae paude lagaate hain khudaayaa rahm in maasum bachchon ke laDakpan par jinhein kaaghaz siyah karne the vo kaaghaz uThaate hain bahut aansu rulaae hain hamein taqsim-e-gulshan ne muhaajir vo samajhte hain to ye baaghi bataate hain main apne zarf se baDh kar agar kuchh maang letaa huun to phir ehsaas ke shoale sukun meraa jalaate hain musibat koi aa jaae kisi par is zamaane mein to phir kyaa ghair kyaa apne sabhi daaman bachaate hain"