Ghazal

"khuun se gundhaa miTTi ko aur aadam ko taamir kiyaa uupar vaale ne bhi apne khvaabon ko taabir kiyaa tanhaai ke saaz pe chheDe saare dard sadaaon ke vahshat ke aanchal se lipTe aur use zanjir kiyaa jis lahje ko bhi jhuThlaayaa haath mein us ke khaak lagi jis abru tak haath baDhaayaa ham ne us ko tiir kiyaa upar jaane vaale raste pasti ke mohtaaj kiye ham jis ke qadmon mein baiThe us ko hi jaagir kiyaa meraa chehra dekhne vaalo paDhnaa bhi to sikho naa kitne mushkil mausam kaaTe aur un ko tafsir kiyaa apnaa ronaa rone vaale tu kis khet ki muuli hai ishq ne tujh se pahle jaane kitnon ko raahgir kiyaa"

"rabt arsh-e-barin se niklegaa meraa shajara vahin se niklegaa ghar to dahshat se kaanp jaaeinge zalzala jab makin se niklegaa harf aaegaa phir naqaabon par aaina jab kahin se niklegaa yaar yaaron ki baat mat chheDo qaafila aastin se niklegaa mar bhi jaaun to meri miTTi kaa har taalluq zamin se niklegaa"

"gham kamaai se chal rahaa hai dil kis DhiTaai se chal rahaa hai dil aap aae to mujh ko aisaa lagaa khush-numaai se chal rahaa hai dil varna andar se kuchh nahin baaqi khud-numaai se chal rahaa hai dil teraa milnaa shifaa kaa baais hai is davaai se chal rahaa hai dil ishq mein hijr kaa sahaaraa hai piir bhaai se chal rahaa hai dil hijr ne daagh dhoe aankhon ke is safaai se chal rahaa hai dil gham ne khole qafas ki dar mujh pe is rihaai se chal rahaa hai dil"

"umr guzri hai to phir hosh ko rab yaad aayaa mar gayaa shauq to phir is kaa sabab yaad aayaa din kaa aaghaaz huaa aankh mein aansu aae avval-e-shab kaa ziyaan aakhir-e-shab yaad aayaa mujh ko to yaad naa thaa us se judaa ho jaanaa vo to batlaayaa mujhe us ne to tab yaad aayaa ab ke shahron mein bhi jangal ki havaa aisi chali maaein bistar mein chhupin bheDiyaa jab yaad aayaa meri tarah se vo yak-rangi se tang aayaa to din ko phir raat mein Dhal jaane kaa Dhab yaad aayaa"

"zakhm ki fasl ab hari samjho ye mulaaqaat aakhiri samjho niyaton ke samar se miltaa hai is davaai ko daaimi samjho ab ye divaar girne vaali hai apni tasvir aarzi samjho main tujhe tujh se chhin sakti huun apni haalat ko bebasi samjho ab ye parde kaa Dhong izaafi hai main samajhti huun aap bhi samjho"

"mire kaandhon ke bilkul darmiyaan rakkhaa gayaa hai miraa chehraa miraa jhuTaa nishaan rakkhaa gayaa hai main ab aankhon mein aankhein Daal kar karti huun baatein mujhe sadiyon se itnaa be-zabaan rakkhaa gayaa hai banaa kar ek peshaani phir us ne had banaai phir us kaa naam us se kahkashaan rakkhaa gayaa hai main yunhi to nahin khud se hi baahar aa gai huun mire sar par koi to aasmaan rakkhaa gayaa hai main kyuun jazbaat se aari kisi shai ko kahun dil mire pahlun mein koi be-amaan rakkhaa gayaa"

"shaam yuun dil ke kinaare se guzar jaati hai jaise lakDi koi aare se guzar jaati hai main use yaad ki baisaakhiyaan laa deti huun shab apaahij hai sahaare se guzar jaati hai 'ishq mein donon jahaan apne hi kahlaate hain baat phir mere tumhaare se guzar jaati hai zindagi jitni bhi dushvaar huun raahein lekin aap ke ek ishaare se guzar jaati hai main ne logon se sunaa hai ki vo paagal laDki hansti rahti hai khasaare se guzar jaati hai main tujhe dekh ke an-dekhaa bhi kar sakti huun aankh muDti hai nazaare se guzar jaati hai"

"dekh tu kis qadar bhalaa dukh hai shaam hote hi aa gayaa dukh hai dil ki divaar par Tangi aankhein dil ki dahliz par jamaa dukh hai thak ke baiThi huun ek kone mein aur kamre mein ghumtaa dukh hai mujh se puchho naa khairiyat kaa sabab mere har dard ki davaa dukh hai zindagi to haqiqi maanon mein khaak se khaak par likhaa dukh hai yaa mire dushmanon kaa dukh hai mujhe yaa miri aastin kaa dukh hai haath kaanon pe rakh liye main ne kis qadar chup mein chikhtaa dukh hai mere hansne pe phir 'muqaddas' ji aa ki mujh par baras paDaa dukh hai"

"miTTi ne jab khauf ugaanaa siikh liyaa inTon ne divaar chabaanaa siikh liyaa munh par bhuuk tamaanche khaa kar baiThi hai bhukon ne kachre se khaanaa siikh liyaa yaar ab mujh ko chhoD ke tu jaa saktaa hai main ne khvaabon ko dafnaanaa siikh liyaa jitni gahri chup hai utni aavaazein khaamoshi ne shor machaanaa siikh liyaa miTTi par ungli se miTTi likh denaa main ne apnaa dil bahlaanaa siikh liyaa andar kaa dukh baahar le kar aaungi main ne bhi tasvir banaanaa siikh liyaa"

"tum jo shaamil hue khayaalon mein raushni aa gai havaalon mein ab to ai chaand baam par aa jaa chaandni aa gai hai baalon mein us ne nazrein hi pher li mujh se kuchh nahin rah gayaa savaalon mein ek lamhe ki to zarurat thi aur vo lamha na aayaa saalon mein teri aankhon pe baat hone lagi jang si chhiD gai ghazaalon mein qatl insaaniyat kaa karte hain bheDiye aadmi ki khaalon mein ye 'muqaddas' haqiqi duniyaa hai aap rahti hain kin khayaalon mein"