Ghazal

"us ke dil par asar nahin hotaa be-khabar baa-khabar nahin hotaa ishq hi jin kaa din-o-mazhab ho maut kaa un ko Dar nahin hotaa pyaar kartaa na main agar tujh se is tarah dar-ba-dar nahin hotaa jaane kyon khushk ho gaiin aankhein ab to daaman bhi tar nahin hotaa dil ki viraan ho gai basti us kaa jab se guzar nahin hotaa ai mire ham-safar kahaan hai tu mujh se tanhaa safar nahin hotaa hausle dil ke hon buland agar raasta pur-khatar nahin hotaa"

"vo aur hain jinhein haalaat saazgaar mile hamein to phuul ki chaahat mein sirf khaar mile bahaar-e-laala-o-gul kaa huun mustahiq main bhi mujhe bhi kaash kabhi mausam-e-bahaar mile ye sard aahein ye andoh-o-gham ye bechaini sile vafaa ke mujhe kitne shaandaar mile badal vafaa kaa vafaa hi milegaa sochaa thaa is aarzu mein magar zakhm be-shumaar mile dayaar-e-gham mein bhi main muskuraa ke ji lungaa agar jahaan mein koi mujh ko gham-gusaar mile sunaa sakaa na kabhi daastaan-e-dil un ko mile to dosh-e-havaa par mujhe savaar mile ye kaise maan luun khush hain vo apni duniyaa mein mujhe vo jab bhi mile hain to sogvaar mile"

"main tiri dushmani ko bhuul gayaa aur tu dosti ko bhuul gayaa jab se kaanTe chune hain daaman mein phuul ki taazgi ko bhuul gayaa is qadar zulmaton ne gheraa hai ishrat-e-raushni ko bhuul gayaa jab achaanak nazar paDi is par khud ko main do ghaDi ko bhuul gayaa khud-pasandi ke is zamaane mein aadmi aadmi ko bhuul gayaa hosh apnaa bhi ab kahaan mujh ko har sitam har khushi ko bhuul gayaa pi ke niklaa jo mai-kade se main har gham-e-zindagi ko bhuul gayaa"

"ham bhi ik zamaane tak haadson se khele hain gham uThaae hain paiham dard ham ne jhele hain uf ye dasht-paimaai uf ye aabla-paai jaada-e-mohabbat mein kis qadar jhamele hain tum se dil lagaane ki ye sazaa mili mujh ko ranj-o-gham ki yurish hai hasraton ke rele hain do dilon ko aae to kis tarah qaraar aae tum vahaan akeli ho ham yahaan akele hain dekh kar miraa chehra ab nazar churaati ho yaad hogaa bachpan mein donon saath khele hain ik gharaundaa miTTi kaa jo kabhi banaayaa thaa aaj mere haathon mein us ke chand Dhele hain ruuh mutmain ho aur dil ho dard se khaali phir to jis taraf dekho zindagi ke mele hain"

"birhaa ki kaali raaton mein jab bhi dil ghabraataa hai main dil ko samjhaataa huun aur dil mujh ko samjhaataa hai us jaisaa be-baak na dekhaa main ne koi zamaane mein meraa hi dil chori kar ke mujh se nazar milaataa hai aaine ko kyon hairat hai dekh ke mere ashkon ko tanhaai mein rone se gham kaa baadal chhaT jaataa hai tark-e-vafaa karne ki us ki apni hi majburi thi phir bhi us ko dekh ke tanhaa dil meraa bhar aataa hai pyaar miraa to jhuTlaataa hai har apne begaane se aisi baatein kar ke mere dil ko kyon dahlaataa hai aaj ghiraa huun gham ke bhanvar mein kal khushiyaan hongi haasil maujon se jo Takraataa hai vo saahil paa jaataa hai ye duniyaa jab zakhm koi deti hai main hans detaa huun lekin aankhein bhar aati hain zikr jo teraa aataa hai"

"is kam-sini mein dekhiye aalam shabaab kaa jaise chaman mein phuul khilaa ho gulaab kaa mujh par sharaab-noshi kaa ilzaam mat lagaa dekhaa hai teri aankhon mein dariyaa sharaab kaa baiThaa huun us ke saamne phir bhi hai tishnagi haail hai darmiyaan mein parda hijaab kaa tum mere saath saath ho aataa nahin yaqin mahsus mujh ko hotaa hai manzar ye khvaab kaa do aashiqon ko Duube zamaana guzar gayaa utraa huaa hai aaj bhi chehra chanaab kaa is ke sivaa kisi ko bhi pahchaantaa nahin ye haal ho gayaa dil-e-khaana-kharaab kaa tum gham ataa karo ki khushi sab qubul hai muddat se muntazir huun tumhaare javaab kaa"

"dil bahaltaa hi nahin hai jab kisi tadbir se haal-e-dil kahtaa huun apnaa main tiri tasvir se tirgi chhaai hui hai is qadar ab chaar-su jaise raushan hi na hogi zindagi tanvir se apne haathon se bigaaDaa main ne jab taqdir ko phir karun kyun-kar shikaayat kaatib-e-taqdir se dil mein pahle hi gham-o-aalaam-e-duniyaa kam na the aur ghaayal ho gayaa teraa nazar ke tiir se ab na rangin khvaab mustaqbil ke dikhlaao mujhe khuub vaaqif huun main aise khvaab ki taabir se kuchh ajab aalam hai dil kaa jab se teraa khat paDhaa tujh ko kyaa maalum dil kitnaa dukhaa tahrir se sirf maayusi ki daldal hai jidhar bhi dekhiye ham ko ye tohfa milaa hai husn ki jaagir se"

"lo aaj nae andaaz mein phir ek baat puraani kahte hain jo aag lagaa de tan-man mein ham us ko javaani kahte hain rusvaai tiri manzur nahin izhaar karein to kaise karein ham apni mohabbat kaa qissa ashkon ki zabaani kahte hain gar aanch kabhi tujh par aae main apni jaan luTaa dungaa jo kaam kisi ke aa na sake us khuun ko paani kahte hain hai fasl-e-bahaaraan aaj magar kal daur-e-khizaan bhi aaegaa kyaa soch ke tum itraati ho is husn ko faani kahte hain divaanon ko is se kyaa matlab vo patjhaD ho yaa mausam-e-gul jis rut mein yaar ho pahlu mein us rut ko suhaani kahte hain dam ghuTne lagaa hai ab meraa khaamosh rahun aakhir kab tak rudaad-e-mohabbat ko meri sab raam-kahaani kahte hain ye rog nahin ye jog nahin sanjog ki hain saari baatein sab log na jaane kyon tujh ko ik prem-divaani kahte hain"