Ghazal

"gorakh-dhandhaa ho jaaun kyaa? main bhi tum saa ho jaaun kyaa? ghazlon ki basti suuni hai phir aavaara ho jaaun kyaa? sach kaa girvi chhuDvaanaa hai thoDaa jhuTaa ho jaaun kyaa? saavan ne aansu se puchhaa main bhi khaaraa ho jaaun kyaa? sab ummidein Duub rahi hain tinkaa tinkaa ho jaaun kyaa? ghar daftar ke baTvaare mein aadhaa aadhaa ho jaaun kyaa? manDi ab bas uThne ko hai thoDaa sastaa ho jaaun kyaa? sab kaa ho kar dekh chukaa huun vaapas khud kaa ho jaaun kyaa?"

"tumhaari yaad ke manzar puraane gher lete hain na jaane DhunDh kar kaise kahaan se gher lete hain jo ham ne un dinon bas yuun hi pokhar mein uchhaale the lagun jab Dubne to vo hi tinke gher lete hain main aisi shohraton ki soch se bhi khauf khaataa huun jidhar niklo udhar akhbaar vaale gher lete hain khudaa jaane khudaa ne kyuun mujhe itnaa navaazaa hai main jab bhi laDkhaDaataa huun sahaare gher lete hain ye taaqat aur ye shohrat samay kaa pher hai pyaare gali apni ho to haathi ko kutte gher lete hain ye mere dost bhi kam-bakht rone tak nahin dete zaraa saa aankh kyaa bhigi kamine gher lete hain"

"main jab se sach ko sach kahne lagaa huun jahaan ki aankh mein chubhne lagaa huun ujaalaa baanTne ki ye sazaa hai anhariyaa chaand saa ghaTne lagaa huun bharam rakhnaa un aankhon kaa ki jin ko main roshan-daan saa lagne lagaa huun main us kirdaar ko ab ji sakungaa main us kirdaar par marne lagaa huun"

"jo ham teri aankhon ke taare hue hain kai ratjagon ke sanvaare hue hain baraabar pe chhuTi mohabbat ki baazi na jiite hue hain na haare hue hain unhin ki nazar mein utarnaa hai ham ko jo ham ko nazar se utaare hue hain qalam yaad coffē bharam chand panne bas itne mein bhi din guzaare hue hain ghazal kaa hunar sirf haasil ghamon kaa ye ashaar ashkon se khaare hue hain"

"donon jaanib qaid-shuda is khush-fahmi mein rahte hain sarhad ke us paar parinde aazaadi mein rahte hain shaam talak aadaab bajaate gardan dukhne lagti hai payaade ho kar shaahon vaali aabaadi mein rahte hain gar roe to aankhon ke sab baashinde bah jaaeinge haae shikasta khvaab hamaare is basti mein rahte hain zina-dar-zina jab teri yaad utar kar aati hai munh baae ashaar hamaare hairaani mein rahte hain us ki bak-bak ghar se chal kar chaand talak ho aati hain aur ham gum us ke honTon ki turpaai mein rahte hain chaar kitaabein saath nahin aur sau ghazlein kah bhi maarin ab ke likhne vaale jaane kis jaldi mein rahte hain aadhi raat ghazal kahne kaa shauq kise hai 'saurabh'-ji bas itni si baat hai tab ham tanhaai mein rahte hain"

"tirgi ki apni zid hai jugnuon ki apni zid Thokaron ki apni zid hai hauslon ki apni zid kaun saa qissa sunaaun aap ko mushkil ye hai aansuon ki apni zid hai qahqahon ki apni zid giit mere chuum aaeinge tumhein ban kar sabaa sarhadon ki apni zid hai hasraton ki apni zid raaston ne khuub samjhaayaa ulajhnaa mat magar rahzanon ki apni zid hai rahbaron ki apni zid haae Tapkaa hai lahu phir aaj ke akhbaar se chaaquon ki apni zid hai pasliyon ki apni zid dhaDkanon ki baat maanun yaa ki aaine ki ab? aarzu ki apni zid hai jhurriyon ki apni zid"

"teri daulat rah jaaegi tere ghar chaubaaron tak mere akhshar sair kareinge suraj chaand sitaaron tak baat kafan ki nikli thi par raste mein nilaam hui rang-birangi chunari ho gai jab pahunchi akhbaaron tak jis ko jaisaa rog diyaa hai us kaa vaisaa chaara-gar bimaaron tak ved-ji pahunche shaaer ishq ke maaron tak mai-khaane mein aur to kyaa thaa ham-zakhmon ki mahfil thi bechaaron se shurua hui thi khatm hui bechaaron tak jamhuri tahzib yahi hai sabki apni had-bandi jantaa ki had ek mohar tak netaaon ki naaron tak"

"dard ghaTtaa bhi nahin hai ki fanaa ho jaae aur baDhtaa bhi nahin hai ki davaa ho jaae hai mujhe 'ilm ki ye khvaab hai par khvaab mein hi mere allaah use mujh se vafaa ho jaae us kaa ehsaan hi itnaa hai meri saanson par ghair-mumkin hai ki saanson se adaa ho jaae vo kisi roz kare tark-e-ta'alluq khud se aur usi din se miraa sirf miraa ho jaae laakh achchhaa ho to meraa jo nahin khaak achchhaa is se achchhaa hai ki tu sach mein buraa ho jaae vaqt ko kar de qalam khud ko siyaahi kar de teraa sochaa huaa qismat kaa likhaa ho jaae mujh ko maa'lum hai vo shakhs meraa hai lekin hai ye laazim ki ab us ko bhi pataa ho jaae"