Ghazal

"tumhein dil-lagi bhuul jaani paDegi mohabbat ki raahon mein aa kar to dekho taDapne pe mere na phir tum hansoge kabhi dil kisi se lagaa kar to dekho vafaaon ki ham se tavaqqo nahin hai magar ek baar aazmaa kar to dekho zamaane ko apnaa banaa kar to dekhaa hamein bhi tum apnaa banaa kar to dekho khudaa ke liye chhoD do ab ye parda ki hain aaj ham tum nahin ghair koi shab-e-vasl bhi hai hijaab is qadar kyon zaraa rukh se aanchal uThaa kar to dekho jafaaein bahut kiin bahut zulm Dhaae kabhi ik nigaah-e-karam is taraf bhi hamesha hue dekh kar mujh ko barham kisi din zaraa muskuraa kar to dekho jo ulfat mein har ik sitam hai gavaaraa ye sab kuchh hai paas-e-vafaa tum se varna sataate ho din-raat jis tarah mujh ko kisi ghair ko yuun sataa kar to dekho agarche kisi baat par vo khafaa hain to achchhaa yahi hai tum apni si kar lo vo maanein na maanein ye marzi hai un ki magar un ko 'purnam' manaa kar to dekho"

"donon aalam se vo begaana nazar aataa hai jo tire ishq mein divaana nazar aataa hai ishq-e-but kaaba-e-dil mein hai khudaayaa jab se teraa ghar bhi mujhe but-khaana nazar aataa hai shoala-e-ishq mein dekhe koi jalnaa dil kaa shama ke bhes mein parvaana nazar aataa hai misr kaa chaand bhi shaidaa hai azal se un kaa husn kaa husn bhi divaana nazar aataa hai baaghbaan baagh mein kis shokh ki tahrir hai ye varaq-e-gul pe jo afsaana nazar aataa hai hai ajab husn-e-tasavvur tire divaane kaa tere jaisaa tiraa divaana nazar aataa hai un ki mast aankh mire dil mein hai raqsaan 'purnam' khuub paimaane mein paimaana nazar aataa hai"

"doston ke sitam ki baat karo baat gham ki hai gham ki baat karo sachchi baaton ke ho agar qaail apni jhuTi qasam ki baat karo apnaa kaaba hai kucha-e-jaanaan ham se ku-e-sanam ki baat karo chaahte ho jo tum dilon kaa milaap chhoD ke main ko ham ki baat karo jin ke naqsh-e-qadam hain raah-numaa un ke naqsh-e-qadam ki baat karo dard jis ne diyaa hai bahr-e-khudaa us nigaah-e-karam ki baat karo baat ashk-e-vafaa ki hai yaaro 'purnam'-e-dida-nam ki baat karo"

"mujhe ranj hogaa na maut kaa agar aisi maut nasib ho miraa dam jo nikle to ai khudaa mire paas meraa habib ho hai abas davaaon kaa sochnaa na tu fikrmand tabib ho tu ilaaj us kaa karegaa kyaa jo mariz-e-ishq-e-habib ho kar asiir mujh ko ba-sad-khushi magar itni arz bhi sun miri vahaan qaid kar ki qafas miraa mire aashiyaan ke qarib ho jise tere husn ki ho khabar vahi chashm-e-ishq hai mo'tabar baDi khush-nasib hai vo nazar tiri diid jis ko nasib ho shab-o-roz 'purnam'-e-gham-zada rahe dard-e-dil mein jo mubtalaa vo qaraar paae to kis tarah use chain kaise nasib ho"

"aag bhi dil mein lagi hai aur ashk-e-gham bhi hai ishq kahte hain jise shoala bhi hai shabnam bhi hai vaqt-e-aakhir chaaraagar jitni khushi hai gham bhi hai yaar ki surat bhi hai aankhon mein meraa dam bhi hai baais-e-taklif bhi hai baais-e-aaraam bhi yaad-e-jaanaan zakhm bhi hai zakhm kaa marham bhi hai phir khataa jannat mein hogi baavajud-e-ehtiyaat sirf aadat hi nahin ye fitrat-e-aadam bhi hai sab ke aansu ponchhne vaale idhar bhi dekh le aab-dida teri mahfil mein tiraa 'purnam' bhi hai"

"vaqt jab saazgaar hotaa hai sach hai dushman bhi yaar hotaa hai baanT le gham jo gham ke maaron kaa vo baDaa gham-gusaar hotaa hai log us ko bhi kaaT dete hain peD jo saaya-daar hotaa hai jis kaa koi nahin zamaane mein us kaa parvardigaar hotaa hai jis ke aaghaaz kaa ho nek anjaam kaam vo shaandaar hotaa hai aap gulshan mein jab nahin hote gul bhi nazron mein khaar hotaa hai dil ki baazi vo haar ke bole jiit kaa naam haar hotaa hai vo baDaa khush-nasib hai yaaro yaar ko jis se pyaar hotaa hai chashm-e-bimaar band hone lagi khatm ab intizaar hotaa hai us kaa laasha koi na ho jis kaa be-kafan be-mazaar hotaa hai dida-e-ahl-e-dard mein 'purnam' ashk dil ki pukaar hotaa hai"

"rakhte hain dushmani bhi jataate hain pyaar bhi hain kaise gham-gusaar mire gham-gusaar bhi afsurdagi bhi rukh pe hai un ke nikhaar bhi hai aaj gulsitaan mein khizaan bhi bahaar bhi piitaa huun main sharaab-e-mohabbat to kyaa huaa piitaa hai ye sharaab to parvardigaar bhi milne ki hai khushi to bichhaDne kaa hai malaal dil mutmain bhi aap se hai be-qaraar bhi aa kar vo meri laash pe ye kah ke ro diye tum se huaa na aaj miraa intizaar bhi ai dost baad-e-marg bhi main huun shikasta-haal dil ki tarah se TuuTaa huaa hai mazaar bhi 'purnam' ye sab karam hai 'qamar' kaa jo aaj-kal hotaa hai ahl-e-fan mein tumhaaraa shumaar bhi"