Ghazal

"jo tum se pahle aae the un ki kaaristaani dekho gaanv se nikle ho to ab shahron ki viraani dekho sote mein marne kaa mauqaa mil jaataa hai sab logon ko phir bhi zinda uTh jaate hain logon ki naadaani dekho rokoge to phaT jaaungaa yaaro tum bas itnaa karnaa kuchh mat kahnaa mujh se jab meri aankhon mein paani dekho saaton aalam sar karne ke baad ik din ki chhuTTi le kar ghar mein chiDiyon ke gaane par bachchon ki hairaani dekho itne firaunon ko maaroge to kyaa tum bach jaaoge musaa-ji ye ghussa chhoDo aur apni aasaani dekho"

"is e'tibaar se be-intihaa zaruri hai pukaarne ke liye ik khudaa zaruri hai hazaar rang mein mumkin hai dard kaa izhaar tire firaaq mein marnaa hi kyaa zaruri hai shuur shahr ke haalaat kaa nahin sab ko bayaan shahr ke haalaat kaa zaruri hai kuchh aaise sher hain yaaro jo ham nahin kahte har ek baat kaa izhaar kyaa zaruri hai 'shujaaa' maut se pahle zarur ji lenaa ye kaam bhuul na jaanaa baDaa zaruri hai"

"takalluf chhoD kar mere baraabar baiTh jaaegaa tasavvur mein abhi vo paas aa kar baiTh jaaegaa dar-o-divaar par itnaa paDaa hai saare din paani agar kal dhuup bhi niklegi to ghar baiTh jaaegaa aDegaa khud to laaegaa khabar saat aasmaanon ki uDaayaa to parinda chhat ke uupar baiTh jaaegaa na manzil ko pataa hogaa na raston ko khabar hogi musaafir ek din aaraam se ghar baiTh jaaegaa khayaal achchhaa huaa to sher ban kar aaegaa baahar bahut achchhaa huaa to dil ke andar baiTh jaaegaa"

"sardi bhi khatm ho gai barsaat bhi gai aur is ke saath garmi-e-jazbaat bhi gai us ne miri kitaab kaa dibaacha paDh liyaa ab to kabhi kabhi ki mulaaqaat bhi gai main aasmaan pe jaa ke bhi taare na laa sakaa tum bhi gae udaas miri baat bhi gai ham sufiyon kaa donon taraf se ziyaan huaa irfaan-e-zaat bhi na huaa raat bhi gai milne lagi hai aam to piinaa bhi kam huaa qillat ke khatm hote hi buhtaat bhi gai"

"dost kaa ghar aur dushman kaa pata maalum hai zindagi ham ko tiraa ye silsila maalum hai zindagi jaa ham bhi ku-e-aarzu tak aa gae is ke aage ham ko saaraa raasta maalum hai kyaa munajjim se karein ham apne mustaqbil ki baat haal ke baare mein ham ko kaun saa maalum hai yaa to jo naa-fahm hain vo bolte hain in dinon yaa jinhein khaamosh rahne ki sazaa maalum hai sher par to aap ki qudarat musallam hai 'shujaa' is zamaane kaa bhi kuchh achchhaa buraa maalum hai"

"pahle huaa jo karte the ham vo nahin rahe dekho shab-e-firaaq hai aur ro nahin rahe aisi bhi ro rahe hain unhein jo nahin rahe pahle se moajize to kahin ho nahin rahe yaaro dikhaao phir koi aisaa hunar ki bas ghairon ki koi fikr hi ham ko nahin rahe ashaar se ayaan hain to ashaar mat paDho ham dil ke daagh tum ko dikhaa to nahin rahe tadbir bhi hai jaan bhi hai maslahat bhi hai rahnaa na thaa bas ek hamein so nahin rahe ham ghair aur vo sabhi apni jagah pe hain bas yuun kaho miyaan ki ghazal-go nahin rahe"

"us bevafaa kaa shahr hai aur vaqt-e-shaam hai aise mein aarzu baDi himmat kaa kaam hai ham ko bhi chhoDtaa huaa aage nikal gayaa jazbon kaa qaafila bhi baDaa tez-gaam hai be-aarzu bhi khush hain zamaane mein baaz log yaan aarzu ke saath bhi jiinaa haraam hai lafzon ki jaan chhoD de mafhum ko pakaD varna ye sab mu'aamla tajnis-e-taam hai tauba ke silsile mein bas itnaa kaheinge ham maslak ho baada-noshi to tauba haraam hai aankhon kaa hai khayaal ki daanaa hai daam mein aur fikr kah rahi hai ki daane mein daam hai naqqaad tum ko puchhte aae the kal 'shujaa' kahte the shaa'iron mein tumhaaraa bhi naam hai"

"haalaat na badlein to isi baat pe ronaa badlein to badalte hue haalaat pe ronaa paD jaaegaa tum ko bhi gham-e-zaat pe ronaa jis baat pe hanste ho usi baat pe ronaa izhaar mein quvvat hai to mil jaaegaa mauzua sukhaa nahin paDtaa hai to barsaat pe ronaa is shahr mein sab Thiik hai kyaa soch rahe ho ronaa hai to apne hi khayaalaat pe ronaa main aap ki is sard-mizaaji pe hansungaa aur aap miri shiddat-e-jazbaat pe ronaa"

"khudaa ne chaahaa to sab intizaam kar deinge ghazal pe aae to matla' mein kaam kar deinge paDe rahein to qalandar uThein to fitna hain hamein jagaayaa to nindein haraam kar deinge tumhaare jaise jiye aur kuchh nahin kar paae hamaare jaise mare bhi to naam kar deinge ham aaj bhi hain zamin par magar yahi Dar hai ye tabsire hamein aali-maqaam kar deinge tum ek 'umr se tamhid likh rahe ho 'shujaa' ham ek lafz mein qissa tamaam kar deinge"

"yahaan to qaafile bhar ko akelaa chhoD dete hain sabhi chalte hon jis par ham vo rasta chhoD dete hain qalam mein zor jitnaa hai judaai ki badaulat hai milan ke baad likhne vaale likhnaa chhoD dete hain kabhi sairaab kar jaataa hai ham ko abr kaa manzar kabhi saavan baras kar bhi piyaasaa chhoD dete hain zamin ke masalon kaa hal agar yuun hi nikaltaa hai to lo ji aaj se ham tum se milnaa chhoD dete hain mohazzab dost aakhir ham se barham kyuun nahin honge sag-e-izhaar ko ham bhi to khullaa chhoD dete hain jo zinda ho use to maar dete hain jahaan vaale jo marnaa chaahtaa ho us ko zinda chhoD dete hain mukammal khud to ho jaate hain sab kirdaar aakhir mein magar kam-bakht qaari ko adhuraa chhoD dete hain vo nang-e-aadmiyat hi sahi par ye bataa ai dil puraane doston ko is tarah kyaa chhoD dete hain ye duniyaa-daari aur irfaan kaa daavaa 'shujaa-khaavar' miyaan irfaan ho jaae to duniyaa chhoD dete hain"

"us ko na khayaal aae to ham munh se kahein kyaa vo bhi to mile ham se hamin us se milein kyaa lashkar ko bachaaeingi ye do-chaar safein kyaa aur un mein bhi har shakhs ye kahtaa hai hamein kyaa ye to sabhi kahte hain koi fikr na karnaa ye koi bataataa nahin ham ko ki karein kyaa ghar se to chale aate hain baazaar ki jaanib baazaar mein ye sochte phirte hain ki lein kyaa aankhon ko kiye band paDe rahte hain ham log is par bhi to khvaabon se hain mahrum karein kyaa do chaar nahin sainkaDon sher us pe kahe hain is par bhi vo samjhe na to qadmon pe jhukein kyaa jismaani taalluq pe ye sharmindagi kaisi aapas mein badan kuchh bhi karein is se hamein kyaa khvaabon se bhi milte nahin haalaat ke Dar se maathe se baDi ho gaiin yaaro shikanein kyaa"

"samajhte kyaa hain in do chaar rangon ko udhar vaale tarang aai to manzar hi badal deinge nazar vaale isi par khush hain ki ik dusre ke saath rahte hain abhi tanhaai kaa matlab nahin samjhe hain ghar vaale sitam ke vaar hain to kyaa qalam ke dhaar bhi to hain guzaara khuub kar lete hain izzat se hunar vaale koi surat nikalti hi nahin hai baat hone ki vahaan zoam-e-khudaa-vandi yahaan jazbe bashar vaale mafaailun kaa paimaana bahut hi tang hotaa hai jabhi to sher ham kahte nahin hain dil jigar vaale gharon mein the to vusat dasht ki ham ko bulaati thi magar ab dasht mein aae to yaad aate hain ghar vaale jo mustaqbil se pur-ummid ho vo shaaer-e-mutlaq 'shujaa-khaavar' se apni fikr ki islaah karvaa le"

"rakhte hain apne khvaabon ko ab tak aziiz ham haalaanki is mein ho gae dil ke mariz ham us ke bayaan se hue har-dil-aziz ham gham ko samajh rahe the chhupaane ki chiiz ham ye kaaenaat to kise milti hai chhoDiye apni hi zaat se na hue mustafiz ham chaaragari ki baat kisi aur se karo ab ho gae hain yaaro puraane mariz ham"

"ab tere liye hain na zamaane ke liye hain ham gosha-e-tanhaai sajaane ke liye hain matlab miri tahrir kaa alfaaz se mat puchh alfaaz to mafhum chhupaane ke liye hain haan tere taghaaful se pareshaan hain ham bhi ye tanz ke tevar to dikhaane ke liye hain tum saamne ho phir bhi chale aae zabaan par vo giit jo tanhaai mein gaane ke liye hain khat vaaqai kyaa khuub hai ik parda-nashin kaa alfaaz ibaarat ko chhupaane ke liye hain"

"vijdaan mein vo aayaa ilhaam huaa mujh ko main bhuul gayaa us ko vo bhuul gayaa mujh ko ab Duub hi jaane de itnaa na giraa mujh ko sharminda na kar Daale tinke ki anaa mujh ko main gum-shuda logon ki fehrist mein dab jaataa vo to mire dushman ne pahchaan liyaa mujh ko is ahd mein kyaa rakkhaa thaa jis pe basar hoti kyaa hotaa jo virse mein miltaa na khudaa mujh ko itni baDi duniyaa mein kab se main akelaa huun ai rabb-e-karim apne bandon se milaa mujh ko"