Ghazal

"thi alag raah magar tark mohabbat nahin ki us ne bhi sochaa bahut ham ne bhi ujlat nahin ki tu ne jo dard ki daulat hamein di thi us mein kuchh izaafa hi kiyaa ham ne khayaanat nahin ki zaaviya kyaa hai jo kartaa hai tujhe sab se alag kyuun tire baad kisi aur ki hasrat nahin ki aae aur aa ke chale bhi gae kyaa kyaa mausam tum ne darvaaza hi vaa karne ki himmat nahin ki apne atvaar mein kitnaa baDaa shaatir hogaa zindagi tujh se kabhi jis ne shikaayat nahin ki ek ik saans kaa apne se liyaa sakht hisaab ham bhi kyaa the kabhi khud se bhi muravvat nahin ki"

"badan kajlaa gayaa to dil ki taabaani se niklungaa main suraj ban ke ik din apni peshaani se niklungaa nazar aa jaaungaa main aansuon mein jab bhi rooge mujhe miTTi kiyaa tum ne to main paani se niklungaa tum aankhon se mujhe jaan ke safar ki mat ijaazat do agar utraa lahu mein phir na aasaani se niklungaa main aisaa khub-surat rang huun divaar kaa apni agar niklaa to ghar vaalon ki naadaani se niklungaa zamir-e-vaqt mein paivast huun main phaans ki surat zamaana kyaa samajhtaa hai ki aasaani se niklungaa yahi ik shai hai jo tanhaa kabhi hone nahin deti 'zafar' mar jaaungaa jis din pareshaani se niklungaa"

"iraada ho aTal to moajaza aisaa bhi hotaa hai diye ko zinda rakhti hai havaa aisaa bhi hotaa hai sunaai de na khud apni sadaa aisaa bhi hotaa hai miyaan tanhaai kaa ik saaneha aisaa bhi hotaa hai chhiDe hain taar dil ke khaana-barbaadi ke naghme hain hamaare ghar mein saahib rat-jagaa aisaa bhi hotaa hai bahut hassaas hone se bhi shak ko raah milti hai kahin achchhaa to lagtaa hai buraa aisaa bhi hotaa hai kisi maasum bachche ke tabassum mein utar jaao to shaayad ye samajh paao khudaa aisaa bhi hotaa hai zabaan par aa gae chhaale magar ye to khulaa ham par bahut miThe phalon kaa zaaiqa aisaa bhi hotaa hai"

"ishq mein kyaa kyaa mere junun ki ki na buraai logo ne kuchh tum ne badnaam kiyaa kuchh aag lagaain logo ne mere lahu ke rang se chamki mehndi kitne haathon par shahr mein jis din qatl huaa main eid manaai logo ne ham hi un ko baam pe laae aur ham hi mahrum rahe parda apne naam se uTThaa aankh milaai logon ne logon kaa bhi ehsaan hai ham par ham tere bhi shukr-guzaar teri nazar ne maaraa ham ko laash uThaai logo ne logon ne armaan nikaale hamein hi bigDi raas na aai ham ko 'zafar' kal shaikh samajh kar khuub pilaai logon ne"

"din ko bhi itnaa andheraa hai mire kamre mein saaya aate hue Dartaa hai mire kamre mein gham thakaa-haaraa musaafir hai chalaa jaaegaa kuchh dinon ke liye Thahraa hai mire kamre mein subh tak dekhnaa afsaana banaa Daalegaa tujh ko ik shakhs ne dekhaa hai mire kamre mein dar-ba-dar din ko bhaTaktaa hai tasavvur meraa haan magar raat ko rahtaa hai mire kamre mein chor baiThaa hai kahaan soch rahaa huun main 'zafar' kyaa koi aur bhi kamra hai mire kamre mein"

"dekhein qarib se bhi to achchhaa dikhaai de ik aadmi to shahr mein aisaa dikhaai de ab bhiik maangne ke tariqe badal gae laazim nahin ki haath mein kaasa dikhaai de neze pe rakh ke aur miraa sar buland kar duniyaa ko ik charaagh to jaltaa dikhaai de dil mein tire khayaal ki banti hai ik dhanak suraj saa aaine se guzartaa dikhaai de chal zindagi ki jot jagaae 'ajab nahin laashon ke darmiyaan koi rasta dikhaai de kyaa kam hai ki vajud ke sannaaTe mein 'zafar' ik dard ki sadaa hai ki zinda dikhaai de"

"meri ik chhoTi si koshish tujh ko paane ke liye ban gai hai masala saare zamaane ke liye ret meri umr main bachcha niraale mere khel main ne divaarein uThaai hain giraane ke liye vaqt honTon se mire vo bhi khurach kar le gayaa ik tabassum jo thaa duniyaa ko dikhaane ke liye aasmaan aisaa bhi kyaa khatra thaa dil ki aag se itni baarish ek shole ko bujhaane ke liye chhat Tapakti thi agarche phir bhi aa jaati thi niind main nae ghar mein bahut royaa puraane ke liye der tak hanstaa rahaa un par hamaaraa bachpanaa tajrabe aae the sanjida banaane ke liye main 'zafar' taa-zindagi biktaa rahaa pardes mein apni ghar-vaali ko ik kangan dilaane ke liye"

"dhuup hai kyaa aur saayaa kyaa hai ab maalum huaa ye sab khel tamaashaa kyaa hai ab maalum huaa hanste phuul kaa chehra dekhun aur bhar aae aankh apne saath ye qissa kyaa hai ab maalum huaa ham barson ke baad bhi us ko ab tak bhuul na paae dil se us kaa rishta kyaa hai ab maalum huaa sahraa sahraa pyaase bhaTke saari umr jale baadal kaa ik TukDaa kyaa hai ab maalum huaa"