vaaraa-e-farra-e-farhang dekho rang-e-sukhan — Abdul Aziz Khalid

har baat hai 'khaalid' ki zamaane se niraali
baashinda hai shaayad kisi duniyaa-e-digar kaa

nai mohabbatein 'khaalid' puraani dostiyaan
azaab-e-kashmakash-e-be-amaan mein rahte hain

kaun mar kar dobaara zinda huaa
kaun mulk-e-fanaa se lauTaa hai

pursaan-e-pareshaani-e-insaan nahin koi
qismat ki girah naakhun-e-tadbir se kholo

shahidaan-e-vafaa ki manqabat likhte rahe lekin
na ki arzi khudaaon ki kabhi hamd-o-sanaa ham ne

parakhne vaale parkheinge isi meaar par ham ko
jahaan se kyaa liyaa ham ne jahaan ko kyaa diyaa ham ne

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi