mire khvaabon ki chikni siDhiyon par — Abdul Hafiz Naeemi

tumhaare sang-e-taghaaful kaa kyuun karein shikva
is aaine kaa muqaddar hi TuTnaa hogaa

khaDaa huaa huun sar-e-raah muntazir kab se
ki koi guzre to gham kaa ye bojh uThvaa de

mire khulus pe shak ki to koi vajh nahin
mire libaas mein khanjar agar chhupaa niklaa

maazi ke reg-zaar pe rakhnaa sambhal ke paanv
bachchon kaa is mein koi gharaundaa banaa na ho

sadaa kise dein 'naimi' kise dikhaaein zakhm
ab itni raat gae kaun jaagtaa hogaa

main bhi is safha-e-hasti pe ubhar saktaa huun
rang to tum miri tasvir mein bhar kar dekho

mere khvaabon ke jharokon ko sajaate rahiye
na sahi vasl magar yaad to aate rahiye

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

main ne dekhaa hai bahaaron mein chaman ko jalte
hai koi khvaab ki taabir bataane vaalaa

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne