ishq ke fan niin huun main audhōt — Abdul Wahab Yakro

kamaan abru nipaT shah-zor haigaa
ki shaakh-e-aashnaai toD Daali

raam maashuq agar hove aashiq
toD de sar raqib raavan kaa

jabhi tu paan khaa kar muskuraayaa
tabhi dil khil gayaa gul ki kali kaa

pyaasaa mat jalaa saaqi mujhe garmi siin hijraan ki
shitaabi laa sharaab-e-khaam ham ne dil ko bhunaa hai

jane dekhaa so hi bauraa huaa hai
tire til hain magar kaalaa dhaturaa

kham-e-mehraab-e-abruvaan ke biich
kaam aankhon kaa hai imaamat kaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

kam-zarf zamaane ki hiqaarat kaa gila kyaa
main khush huun miraa pyaar samundar ki tarah hai

ek hi anjaam hai ai dost husn o ishq kaa
shama bhi bujhti hai parvaanon ke jal jaane ke baad

rah-e-vafaa mein luTaa kar mataa-e-qalb-o-jigar
kiyaa hai teri mohabbat kaa haq adaa main ne