is hi buniyaad par kyuun na mil jaaein ham — Abdullah Javed

tum apne aks mein kyaa dekhte ho
tumhaaraa aks bhi tum saa nahin hai

dekhte ham bhi hain kuchh khvaab magar haae re dil
har nae khvaab ki taabir se Dar jaataa hai

saahil pe log yunhi khaDe dekhte rahe
dariyaa mein ham jo utre to dariyaa utar gayaa

phir nai hijrat koi darpesh hai
khvaab mein ghar dekhnaa achchhaa nahin

aap ke jaate hi ham ko lag gai aavaargi
aap ke jaate hi ham se ghar nahin dekhaa gayaa

ashk Dhalte nahin dekhe jaate
dil pighalte nahin dekhe jaate

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

bas ik pukaar pe darvaaza khol dete hain
zaraa saa sabr bhi in aansuon se hotaa nahin

dard ki had se guzarnaa to abhi baaqi hai
TuuT kar meraa bikharnaa to abhi baaqi hai

tere rone ki khabar rakhti hain aankhein meri
teraa aansu mire rumaal mein aa jaataa hai