tire badan ke gulistaan ki yaad aati hai — Aftab Hussain

ye soch kar bhi to us se nibaah ho na sakaa
kisi se ho bhi sakaa hai miraa guzaara kahin

apne hi dam se charaaghaan hai vagarna 'aaftaab'
ik sitaara bhi miri viraan shaamon mein nahin

kyaa khabar mere hi siine mein paDi soti ho
bhaagtaa phirtaa huun jis rog-bhari raat se main

kin manzaron mein mujh ko mahaknaa thaa 'aaftaab'
kis regzaar par huun main aa kar khilaa huaa

kab tak saath nibhaataa aakhir
vo bhi duniyaa mein rahtaa hai

dil-e-muztar vafaa ke baab mein ye jald-baazi kyaa
zaraa ruk jaaein aur dekhein natija kyaa nikaltaa hai

mere khvaabon ke jharokon ko sajaate rahiye
na sahi vasl magar yaad to aate rahiye

bas ek raat se kaise thakan utarti hai
badan ko chaahiye aaraam kuchh ziyaada hi

kabhi bhule se bhi ab yaad bhi aati nahin jin ki
vahi qisse zamaane ko sunaanaa chaahte hain ham

main us ke baare mein itnaa ziyaada sochtaa huun
ki ek roz use ru-ba-ru to honaa hai

chalo lahu bhi charaaghon ki nazr kar deinge
ye shart hai ki vo phir raushni ziyaada karein

khudaa raa bahr-e-istiqbaal jald ai jaan baahar aa
ayaadat ko miri jaan-e-jahaan tashrif laate hain