dil-e-betaab ke hamraah safar mein rahnaa — Ahmad Javaid

ek aansu se kami aa jaaegi
ghaaliban dariyaaon ke iqbaal mein

ajab safar thaa ajab-tar musaafirat meri
zamin shuru hui aur main tamaam huaa

dil se baahar aaj tak ham ne qadam rakkhaa nahin
dekhne mein zaahiraa lagte hain sailaani se ham

duniyaa mire paDos mein aabaad hai magar
meri duaa-salaam nahin us zalil se

sukh ki khaatir dukh mat bech
jaal ke pichhe jaal na Daal

gahvaara-e-safar mein khuli hai hamaari aankh
taamir apne ghar ki hui sang-e-mil se

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

lafz-e-ehsaas ko tasvir nahin kar sakte
'ishq duniyaa ki zabaanon se baDaa hai shaayad