kartaa hai kaar-e-raushni mujh ko jalaa ke din — Ain Irfan

miraa vajud jo patthar dikhaai detaa hai
tamaam umr ki shishagari kaa haasil hai

bahut nazdik the tasvir mein ham
magar vo faasla jo dikh rahaa thaa

be-maqsad mahfil se behtar tanhaai
be-matlab baaton se achchhi khaamoshi

jahaan tak Dubne kaa Dar hai tum ko
chalo ham saath chalte hain vahaan tak

bas ek dhun thi samundar ko paar karne ki
main jaantaa thaa samundar ke paar kuchh bhi na thaa

gaamzan hain ham musalsal ajnabi manzil ki samt
zindagi ki aarzu mein zindagi khote hue

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ab teri daad na fariyaad kiyaa kartaa huun
raat din chupke paDaa yaad kiyaa kartaa huun