tishnagi piine ki shab thi — Ain Irfan

miraa vajud jo patthar dikhaai detaa hai
tamaam umr ki shishagari kaa haasil hai

bahut nazdik the tasvir mein ham
magar vo faasla jo dikh rahaa thaa

be-maqsad mahfil se behtar tanhaai
be-matlab baaton se achchhi khaamoshi

jahaan tak Dubne kaa Dar hai tum ko
chalo ham saath chalte hain vahaan tak

bas ek dhun thi samundar ko paar karne ki
main jaantaa thaa samundar ke paar kuchh bhi na thaa

gaamzan hain ham musalsal ajnabi manzil ki samt
zindagi ki aarzu mein zindagi khote hue

jhaankte raat ke garebaan se
ham ne sau aaftaab dekhe hain

raushni ho rahi hai kuchh mahsus
kyaa shab aakhir tamaam ko pahunchi

shor din ko nahin sone detaa
shab ko sannaaTaa jagaa detaa hai

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

ye sar-ba-mohr botalein hain jo sharaab ki
raatein hain un mein band hamaari shabaab ki