ek ham hain ham ne kashti Daal di gardaab mein — Ajiz Matvi

aaghaaz-e-mohabbat mein 'aajiz' rukti na thi mauj-e-ashk-e-ravaan
anjaam ab in khushk aankhon se ik ashk nikalnaa mushkil hai

mahv-e-hairat huun kharaash-e-dast-e-gham ko dekh kar
zakhm chehre par hain yaa hai aaina TuuTaa huaa

hasratein aa aa ke jama ho rahi hain dil ke paas
kaarvaan goyaa pahunchne vaalaa hai manzil ke paas

hotaa hai mahsus ye 'aajiz' shaayad us ne dastak di
tez havaa ke jhonke jab darvaaze se Takraate hain

muntazir huun main kafan baandh ke sar se 'aajiz'
saamne se koi khanjar nahin aayaa ab tak

insaan haadsaat se kitnaa qarib hai
tu bhi zaraa nikal ke kabhi apne ghar se dekh

us imaarat ko giraa do jo nazar aati hai
mire andar jo khanDar hai use taamir karo

saaqi-e-gulfaam ne rakkhi to hai bhar kar sharaab
Dar hai uD jaae na shishe se pari ban kar sharaab

vo buton ne Daale hain vasvase ki dilon se khauf-e-khudaa gayaa
vo paDi hain roz qayaamatein ki khayaal-e-roz-e-jazaa gayaa

jo chhupaa letaa hai divaar ki uryaani ko
dosto aisaa calendar nahin pheinkaa jaataa

khud-kushi bhi nahin mire bas mein
log bas yunhi mujh se Darte hain

vahi na ho ki ye sab log saans lene lagein
amir-e-shahr koi aur khauf taari kar