miri misaal to aisi hai jaise khvaab koi — Ajmal Siraj

ye bhi tai hai ki jo boeinge vo kaaTeinge yahaan
aur ye bhi ki jo khoeinge vahi paaeinge

bas ek shaam kaa har shaam intizaar rahaa
magar vo shaam kisi shaam bhi nahin aai

ab aap khud hi bataaein ye zindagi kyaa hai
karam bhi us ne kiye hain magar sitam jaise

kyaa kahegaa kabhi milne bhi agar aaegaa vo
ab vafaadaari ki qasmein to nahin khaaegaa vo

ye jo ham khoe khoe rahte hain
is mein kuchh dakhl hai tumhaaraa bhi

main ne ai dil tujhe siine se lagaayaa huaa hai
aur tu hai ki miri jaan ko aayaa huaa hai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

use be-numu kisi khvaab ne kahin gahri niind sulaa diyaa
use bhaa gai hain kahaavatein use bhi qafas mein sukun hai

jab se ik khvaab ki taabir mili hai mujh ko
main har ik khvaab ki taabir se ghabraataa huun

kar rahe hain zindagi mein maa'naviyyat ki talaash
khvaab mein Duubaa huaa taalaab sahraa aur main

meri rusvaai ke asbaab hain mere andar
aadmi huun so bahut khvaab hain mere andar