dil-e-pur-shauq ki qismat mein likhi hai naakaami — Akhtar Ansari

us se puchhe koi chaahat ke maze
jis ne chaahaa aur jo chaahaa gayaa

samajhtaa huun main sab kuchh sirf samjhaanaa nahin aataa
taDaptaa huun magar auron ko taDpaanaa nahin aataa

ai soz-e-jaan-gudaaz abhi main javaan huun
ai dard-e-laa-ilaaj ye umr-e-shabaab hai

yaaron ke ikhlaas se pahle dil kaa mire ye haal na thaa
ab vo chaknaachur paDaa hai jis shishe mein baal na thaa

rang o bu mein Duube rahte the havaas
haae kyaa shai thi bahaar-e-aarzu

ragon mein dauDti hain bijliyaan lahu ke evaz
shabaab kahte hain jis chiiz ko qayaamat hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

alag alag taasirein in kii, ashkon ke jo dhaare hain
ishq mein Tapkein to hain moti, nafrat mein angaare hain

isi talaash mein pahunchaa huun ishq tak tere
ki is havaale se paa jaaun main davaam apnaa

main kisi aur hi aalam kaa makin huun pyaare
mere jangal ki tarah ghar bhi hai sunsaan miraa

ishq mein vo bhi ek vaqt hai jab
be-gunaahi gunaah hai pyaare