lakir khinch ke baiThi hai tishnagi miri — Alam Khursheed

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

tamaam rang adhure lage tire aage
so tujh ko lafz mein tasvir kartaa rahtaa huun

tahzib ki zanjir se uljhaa rahaa main bhi
tu bhi na baDhaa jism ke aadaab se aage

kisi ko DhunDte hain ham kisi ke paikar mein
kisi kaa chehra kisi se milaate rahte hain

ab kitni kaar-aamad jangal mein lag rahi hai
vo raushni jo ghar mein bekaar lag rahi thi

kabhi kabhi kitnaa nuqsaan uThaanaa paDtaa hai
airon ghairon kaa ehsaan uThaanaa paDtaa hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

pistaan hain habaab aur shikam bahr-e-lataafat
maujein hain baTein peT ki dariyaa kaa bhanvar naaf