teri chaahat hai khvaab-e-paakiza — Aleena Itrat

ham havaa se bachaa rahe the jinhein
un charaaghon se jal gae shaayad

gahre samundaron mein utarne ki le ke aas
baiThe hue hai ek kinaare hamaare khvaab

udaasi shaam tanhaai kasak yaadon ki bechaini
mujhe sab saunp kar suraj utar jaataa hai paani mein

shadid dhuup mein saare darakht suukh gae
bas ik duaa kaa shajar thaa jo be-samar na huaa

abhi to chaak pe jaari hai raqs miTTi kaa
abhi kumhaar ki niyyat badal bhi sakti hai

jin ke mazbut iraade bane pahchaan un ki
manzilein aap hi ho jaati hain aasaan un ki

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

sote mein vo jo mujh se ham-aaghosh ho gae
jitne gile the khvaab-e-faraamosh ho gae

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

aish-e-duniyaa se khush na ho koi
ham ne dekhe hain aise khvaab bahut

har ek shakhs yahaan mahv-e-khvaab lagtaa hai
kisi ne ham ko jagaayaa nahin bahut din se