ham tere aasmaan mein ai harf-e-e'tibaar — Anees Ashfaq

to kyaa huaa jo galaa ye rasan mein rahne lagaa
maza to daana-e-haq kaa dahan mein rahne lagaa

dekhaa hai kisi aahu-e-khush-chashm ko us ne
aankhon mein bahut us ki chamak aai hui hai

is pe hairaan hain kharidaar ki qimat hai bahut
mere gauhar ki tab-o-taab nahin dekhte hain

ye khaana hamesha se viraan hai
kahaan koi dil ke makaan mein rahaa

dastak pe ab gharon se koi boltaa nahin
pahle ye shahr shahr-e-'adam-raftagaan na thaa

na mere haath se chhuTnaa hai mere neze ko
na tere tiir ko teri kamaan mein rahnaa hai

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

pyaaso raho na dasht mein baarish ke muntazir
maaro zamin pe paanv ki paani nikal paDe