bahut saabit-qadam niklein gae vaqton ki tahzibein — Anjum Khaleeq

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

kaisaa firaaq kaisi judaai kahaan kaa hijr
vo jaaegaa agar to khayaalon mein aaegaa

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

allaah ke ghar der hai andher nahin hai
tu yaas ke mausam mein bhi ummid kaa fan siikh

insaan ki niyyat kaa bharosa nahin koi
milte ho to is baat ko imkaan mein rakhnaa

isi khanDar mein mire khvaab ki gali bhi thi
gali mein peD bhi thaa peD par samar bhi thaa

ik khauf-e-dushmani jo taaaqub mein sab ke hai
ik harf-e-lutf jo kahin ghaaeb hai shahr mein

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

ham aur chaah ghair ki allaah se Daro
milte hain tum se bhi to tumhaari khushi se ham

saaqi-e-gulfaam ne rakkhi to hai bhar kar sharaab
Dar hai uD jaae na shishe se pari ban kar sharaab

vo buton ne Daale hain vasvase ki dilon se khauf-e-khudaa gayaa
vo paDi hain roz qayaamatein ki khayaal-e-roz-e-jazaa gayaa