sunte hain ik havaa kaa jhonkaa — Anjum Ludhianvi

khushbuein phuuT ke roi hongi
gul havaaon mein jo bikhraa hogaa

dhuup nikli hai baarishon ke baad
vo abhi ro ke muskuraae hain

dosti bandagi vafaa-o-khulus
ham ye shama jalaanaa bhuul gae

niind kyuun TuuT gai aakhir-e-shab
kaun mere liye taDpaa hogaa

khud-kushi karne mein bhi naakaam rah jaate hain ham
kaun amrit ghol detaa hai hamaare zahr mein

subh kaa khvaab umr bhar dekhaa
aur phir niind aa gai 'anjum'

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

kyaa kahaa khushbuein luTaataa huun
main tiri haan mein haan milaataa huun

ab use apni shabaahat bhi guzarti hai giraan
ghar ke andar koi shisha nahin rahne detaa