niind kyuun TuuT gai aakhir-e-shab — Anjum Ludhianvi

khushbuein phuuT ke roi hongi
gul havaaon mein jo bikhraa hogaa

dhuup nikli hai baarishon ke baad
vo abhi ro ke muskuraae hain

dosti bandagi vafaa-o-khulus
ham ye shama jalaanaa bhuul gae

khud-kushi karne mein bhi naakaam rah jaate hain ham
kaun amrit ghol detaa hai hamaare zahr mein

rang hi se fareb khaate rahein
khushbuein aazmaanaa bhuul gae

subh kaa khvaab umr bhar dekhaa
aur phir niind aa gai 'anjum'

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

vasl ki raat ke sivaa koi shaam
saath le kar sahar nahin aati

aaj phir bujh gae jal jal ke umidon ke charaagh
aaj phir taaron bhari raat ne dam toD diyaa

koi kyaa bataae ki ziist mein na kashish rahi na mazaa rahaa
jo guzar gayaa vo shabaab thaa jo bikhar gayaa vo jamaal thaa