kabhi to baaDh aa ke apne saath sab bahaa gai — Annu Rizvi

apne haathon se zahr mat diije
ye kahin zindagi na ban jaae

main to niklaa thaa charaaghon ko jalaane ke liye
log kam-zarf the daaman ko bachaa kar bhaage

yahaan gharib ko sab kuchh to de diyaa us ne
zamin bichhaae hai aur aasmaan oDhe hai

dariyaa chaDhaa to gaanv ke gaanv bahaa gayaa
utraa to kitne shahr ke naqshe banaa gayaa

us ko ye dil bhuul sakegaa mushkil lagtaa hai
mushkil se to jaa ke kisi se ye dil lagtaa hai

hamaare us ke darmiyaan ye kaisaa faasla rahaa
use bhi sab khabar rahi hamein bhi sab pataa rahaa

pyaaso raho na dasht mein baarish ke muntazir
maaro zamin pe paanv ki paani nikal paDe

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

mohabbat ke gharon ke kachche-pan ko ye kahaan samjhein
in aankhon ko to bas aataa hai barsaatein baDi karnaa

maashuq se bhi ham ne nibhaai baraabari
vaan lutf kam huaa to yahaan pyaar kam huaa

hazaaron mai-kade sar par liye hain
ye baadal hain baDe saamaan vaale

mehraab-e-ibaadat kham-e-abru hai buton kaa
kar baiThe hain kaabe ko musalmaan faraamosh