chaand mere ghar mein utraa thaa kahin Duubaa na thaa — Arif Abdul Mateen

kabhi khayaal ke rishton ko bhi TaTol ke dekh
main tujh se duur sahi tujh se kuchh judaa bhi nahin

vafaa nigaah ki taalib hai imtihaan ki nahin
vo meri ruuh mein jhaanke na aazmaae mujhe

hamin ne raaston ki khaak chhaani
hamin aae hain tere paas chal ke

zaat kaa aaina jab dekhaa to hairaani hui
main na thaa goyaa koi mujh saa thaa mere ru-ba-ru

thaa e'timaad-e-husn se tu is qadar tahi
aaina dekhne kaa tujhe hausla na thaa

titliyaan rangon kaa mahshar hain kabhi sochaa na thaa
un ko chhune par khulaa vo raaz jo khultaa na thaa!

vo chaand hai to aks bhi paani mein aaegaa
kirdaar khud ubhar ke kahaani mein aaegaa

aasmaan jhaank rahaa hai 'khaalid'
chaand kamre mein mire utraa hai

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

vaqt hai ab namaaz-e-maghrib kaa
chaand rukh lab shafaq hai gesu shaam

bahut hasin raat hai magar tum to so rahe ho
nikal ke kamre se ik nazar chaandni to dekho