'arsh' kis dost ko apnaa samjhun — Arsh Malsiyani

mohabbat soz bhi hai saaz bhi hai
khamoshi bhi hai ye aavaaz bhi hai

maut hi insaan ki dushman nahin
zindagi bhi jaan le kar jaaegi

ik raushni si dil mein thi vo bhi nahin rahi
vo kyaa gae charaagh-e-tamannaa bujhaa gae

khushk baaton mein kahaan hai shaikh kaif-e-zindagi
vo to pi kar hi milegaa jo mazaa piine mein hai

balaa hai qahr hai aafat hai fitna hai qayaamat hai
hasinon ki javaani ko javaani kaun kahtaa hai

ishq-e-butaan kaa le ke sahaaraa kabhi kabhi
apne khudaa ko ham ne pukaaraa kabhi kabhi

jab ki pahlu se yaar uThtaa hai
dard be-ikhtiyaar uThtaa hai

chup-chaap sunti rahti hai pahron shab-e-firaaq
tasvir-e-yaar ko hai miri guftugu pasand

ai khaal-e-rukh-e-yaar tujhe Thiik banaataa
jaa chhoD diyaa haafiz-e-quraan samajh kar

vo chaandni vo tabassum vo pyaar ki baatein
hui sahar to vo manzar tamaam shab ke gae

tark kar apnaa bhi ki is raah mein
har koi shaayaan-e-rifaaqat nahin

jamhuriyat-navaaz bashar-dost amn-khvaah
khud ko jo khud diye the vo alqaab kyaa hue