dard meraaj ko pahunchtaa hai — Arsh Malsiyani

jitni vo mire haal pe karte hain jafaaein
aataa hai mujhe un ki mohabbat kaa yaqin aur

ishq-e-butaan kaa le ke sahaaraa kabhi kabhi
apne khudaa ko ham ne pukaaraa kabhi kabhi

mohabbat soz bhi hai saaz bhi hai
khamoshi bhi hai ye aavaaz bhi hai

maut hi insaan ki dushman nahin
zindagi bhi jaan le kar jaaegi

ik raushni si dil mein thi vo bhi nahin rahi
vo kyaa gae charaagh-e-tamannaa bujhaa gae

saaqi miri khamosh-mizaaji ki laaj rakh
iqraar gar nahin hai to inkaar bhi nahin

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

main muskuraataa magar di na ashk ne mohlat
khushi jab ek mili saath gham hazaar mile

bosa honTon kaa mil gayaa kis ko
dil mein kuchh aaj dard miThaa hai

vo agar aa na sake maut hi aai hoti
hijr mein koi to gham-khvaar hamaaraa hotaa