dil khaak huaa pyaar ki is aag mein jal kar — Azhar Naiyyar

thi us ki band muTThi mein chiTThi dabi hui
jo shakhs thaa train ke niche kaTaa huaa

chaahaa hai jis kaa saaya shajar vo babul hai
qismat mein mere aaj bhi saDkon ki dhuul hai

tum bahr-e-mohabbat ke kinaare pe khaDe the
tum ne miri aankhon mein samundar nahin dekhaa

ba-vaqt-e-shaam samundar mein gir gayaa suraj
tamaam din ki thakan se niDhaal aisaa thaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

jo dil rakhte hain siine mein vo kaafir ho nahin sakte
mohabbat diin hoti hai vafaa imaan hoti hai

na jaane kaun si manzil pe aa pahunchaa hai pyaar apnaa
na ham ko e'tibaar apnaa na un ko e'tibaar apnaa

kis DhiTaai se vo dil chhin ke kahte hain 'amir'
vo miraa ghar hai rahe jis mein mohabbat meri