teraa hi raqs silsila-e-aks-e-khvaab hai — Azhar Naqvi

khvaab muTThi mein liye phirte hain sahraa sahraa
ham vahi log hain jo dhuup ke par kaaTte hain

ab to mujh ko bhi nahin milti miri koi khabar
kitnaa gumnaam huaa huun main numaayaan ho kar

raat bhar chaand se hoti rahein teri baatein
raat khole hain sitaaron ne tire raaz bahut

ek ik saans mein sadiyon kaa safar kaaTte hain
khauf ke shahr mein rahte hain so Dar kaaTte hain

dukh safar kaa hai ki apnon se bichhaD jaane kaa gham
kyaa sabab hai vaqt-e-rukhsat ham-safar khaamosh hain

ajab hairat hai akasr dekhtaa hai mere chehre ko
ye kis naa-aashnaa kaa aaine mein aks rahtaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ghaDi vahm mein guzre hain nae akhbaaraat
tire kuche mein gumaan apnaa ye jaasus huaa

guzri siyaahkaari mein yaa rab tamaam umr
aadhi shabaab mein kaTi aadhi khizaab mein

aaj pi lene de saaqi mujhe ji lene de
kal miri raat khudaa jaane kahaan guzregi