zard chehron ki kitaabein bhi hain kitni maqbul — Aziz Bano Darab Wafa

ahmiyat kaa mujhe apni bhi to andaaza hai
tum gae vaqt ki maanind ganvaa do mujh ko

main ne ye soch ke boe nahin khvaabon ke darakht
kaun jangal mein uge peD ko paani degaa

ek muddat se khayaalon mein basaa hai jo shakhs
ghaur karte hain to us kaa koi chehra bhi nahin

ham aise surmaa hain laD ke jab haalaat se palTe
to baDh ke zindagi ne pesh kiin baisaakhiyaan ham ko

main jab bhi us ki udaasi se uub jaaungi
to yuun hansegaa ki mujh ko udaas kar degaa

aaj kam-az-kam khvaabon hi mein mil ke pi lete hain, kal
shaayad khvaabon mein bhi khaali paimaane Takraaein log

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ajnabi shahr mein kuchh khauf saa mahsus huaa
oDh li main ne khamoshi se utaari hui raat

vo gham ataa kiyaa dil-e-divaana jal gayaa
aisi bhi kyaa sharaab ki paimaana jal gayaa

ik na ik din to chukaanaa hai khamoshi kaa hisaab
jaante sab hain magar boltaa koi nahin hai

nashe mein Duub ke zakhm-e-sadaa hue bhi to kyaa
khud apni khaak kuchal kar khudaa hue bhi to kyaa