jab jaal machhere ne sameTaa hai alassubh — Aziz Nabeel

tumhaaraa saath agar ho to joD saktaa huun
vo silsila jo sar-e-daastaan TuuT gayaa

roz dastak si koi detaa hai siine mein 'nabil'
roz mujh mein kisi aavaaz ke par khulte hain

khaamushi TuTegi aavaaz kaa patthar bhi to ho
jis qadar shor hai andar kabhi baahar bhi to ho

ek takhti amn ke paighaam ki
Taang diije unche minaaron ke beach

phir nae saal ki sarhad pe khaDe hain ham log
raakh ho jaaegaa ye saal bhi hairat kaisi

main agar TuuTaa to saaraa shahr bikhregaa 'nabil'
aisaa patthar huun fasil-e-shahr ki buniyaad kaa

shafaq kaa rang kitne vaalehaana-pan se bikhraa hai
zamin o aasmaan ne mil ke unvaan-e-sahar likkhaa

ab kaun si mataa-e-safar dil ke paas hai
ik raushani-e-subh thi vo bhi udaas hai

badan ki aanch se sanvlaa gae hain pairaahan
main phir bhi subh ke chehre pe shaam likhtaa huun

vo kitni jhiDkiyaan khaate hain subh-o-shaam biivi ki
magar vaaiz ko dekhaa aap ne aah-o-fughaan karte

subh hoti hai to daftar mein badal jaataa hai
ye makaan raat ko phir ghar mein badal jaataa hai

shab ki tanhaai mein ubhri hui aavaaz-e-jaras
subh-gaai kaa gajar ho ye zaruri to nahin