jaane kyuun un se milte rahte hain — Baqar Mehdi

is shahr mein hai kaun hamaaraa tire sivaa
ye kyaa ki tu bhi apnaa kabhi ham-navaa na ho

jaane kin mushkilon se jiite hain
kyaa karein koi mehrbaan na rahaa

ham milein yaa na milein phir bhi kabhi khvaabon mein
muskuraati hui aaeingi hamaari baatein

aisi begaanagi nahin dekhi
ab kisi kaa koi yahaan na rahaa

faasle aise ki ik umr mein tai ho na sakein
qurbatein aisi ki khud mujh mein janam hai us kaa

sailaab-e-zindagi ke sahaare baDhe chalo
saahil pe rahne vaalon kaa naam-o-nishaan nahin

gham hai na ab khushi hai na ummid hai na yaas
sab se najaat paae zamaane guzar gae

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

aks-e-khushbu huun bikharne se na roke koi
aur bikhar jaaun to mujh ko na sameTe koi