milaa ke khaak mein sarmaaya-e-dil-e-'bekhud' — Bekhud Dehlvi

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

huron se na hogi ye mudaaraat kisi ki
yaad aaegi jannat mein mulaaqaat kisi ki

raqibon ke liye achchhaa Thikaanaa ho gayaa paidaa
khudaa aabaad rakhe main to kahtaa huun jahannam ko

mohabbat aur majnun ham to saudaa is ko kahte hain
fidaa lailaa pe thaa aankhon kaa andhaa is ko kahte hain

bole vo muskuraa ke bahut iltijaa ke baad
ji to ye chaahtaa hai tiri maan jaaiye

paDhe jaao 'bekhud' ghazal par ghazal
vo but ban gae hain sune jaaeinge

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

aaghaaz-e-mohabbat kaa anjaam bas itnaa hai
jab dil mein tamannaa thi ab dil hi tamannaa hai

kyaa husn ne samjhaa hai kyaa ishq ne jaanaa hai
ham khaak-nashinon ki Thokar mein zamaanaa hai

ishq jab tak na kar chuke rusvaa
aadmi kaam kaa nahin hotaa