fitrat ke taqaaze kabhi badle nahin jaate — Ejaz Rahmani

vo ek pal ki rifaaqat bhi kyaa rifaaqat thi
jo de gai hai mujhe umar bhar ki tanhaai

abhi se paanv ke chhaale na dekho
abhi yaaro safar ki ibtidaa hai

taalaab to barsaat mein ho jaate hain kam-zarf
baahar kabhi aape se samundar nahin hotaa

guzar rahaa huun main saudaa-garon ki basti se
badan pe dekhiye kab tak libaas rahtaa hai

jahaan pe Duub gayaa meri aas kaa suraj
usi jagah vo sitaara-shanaas rahtaa hai

khil rahe hain gulaab zakhmon ke
shukriya aap ki navaazish kaa

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

main badalte hue haalaat mein Dhal jaataa huun
dekhne vaale adaakaar samajhte hain mujhe