shaairi ko miraa izhaar samajhtaa hai magar — Farhat Ehsas

vo chaand kah ke gayaa thaa ki aaj niklegaa
to intizaar mein baiThaa huaa huun shaam se main

ek bose ke bhi nasib na hon
honTh itne bhi ab gharib na hon

phir soch ke ye sabr kiyaa ahl-e-havas ne
bas ek mahina hi to ramzaan rahegaa

mire ashaar hain vo aasmaani khvaab jin ko
miri miTTi ke honThon par utaaraa jaa rahaa hai

ik aayat-e-vajud huun miTTi ke Dher mein
mere nuzul ki to koi shaan hi nahin

mohabbat phuul banne par lagi thi
palaT kar phir kali kar li hai main ne

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

tilaai rang jaanaan kaa agar mazmun likhun khat mein
to haala gird harfon ke bane sone ke paani kaa

jaanib-e-kaaba tu kyuun le gayaa but-khaane se
mujh se divaane ko ai ishq na bahkaanaa thaa

lahron kaa thartharaanaa kyun-kar pasand aave
yaani nazar mein apni khush-gaatiyaan hain teri

kahin dekhaa hai is haiat kaa maashuq
nazar kiijo muslimaanaan! khudaa-raa