laDkhaDaanaa nahin mujhe phir bhi — Fariha Naqvi

ain mumkin hai use mujh se mohabbat hi na ho
dil bahar-taur use apnaa banaanaa chaahe

vo khudaa hai to bhalaa us se shikaayat kaisi?
muqtadir hai vo sitam mujh pe jo Dhaanaa chaahe

kis kis phuul ki shaadaabi ko maskh karoge bolo!!!
ye to us ki den hai jis ko chaahe vo mahkaae

andar aisaa habs thaa main ne khol diyaa darvaaza
jis ne dil se jaanaa hai vo khaamoshi se jaae

aankh aur baadal donon TuuT ke rote hain
jaane in kaa aapas mein kyaa rishta hai

tumhaare rang phike paD gae naan
miri aankhon ki viraani ke aage

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

zaalim hamaari aaj ki ye baat yaad rakh
itnaa bhi dil-jalon kaa sataanaa bhalaa nahin

meraa lahu chaTaaegaa jab tak na tegh ko
qaatil ko dahne haath se khaanaa haraam hai

jo tiir buDhon ki fariyaad tak nahin sunte
to un ke saamne bachchon kaa muskuraanaa kyaa