use maalum hai main sar-phiraa huun — Fazl Tabish

vahi do-chaar chehre ajnabi se
unhin ko phir se dohraanaa paDegaa

na kar shumaar ki har shai gini nahin jaati
ye zindagi hai hisaabon se ji nahin jaati

sunte hain ki in raahon mein majnun aur farhaad luTe
lekin ab aadhe raste se lauT ke vaapas jaae kaun

kamre mein aa ke baiTh gai dhuup mez par
bachchon ne khilkhilaa ke mujhe bhi jagaa diyaa

har ik shai khuun mein Duubi hui hai
koi is tarah se paidaa na hotaa

raat ko khvaab bahut dekhe hain
aaj gham kal se zaraa halkaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ret par ik nishaan hai shaayad
ye hamaaraa makaan hai shaayad