ab yahi mere mashaaghil rah gae — Hafeez Hoshiarpuri

dosti aam hai lekin ai dost
dost miltaa hai baDi mushkil se

zamaane bhar ke gham yaa ik tiraa gham
ye gham hogaa to kitne gham na honge

agar tu ittifaaqan mil bhi jaae
tiri furqat ke sadme kam na honge

duniyaa mein hain kaam bahut
mujh ko itnaa yaad na aa

dil se aati hai baat lab pe 'hafiz'
baat dil mein kahaan se aati hai

ham ko manzil ne bhi gumraah kiyaa
raaste nikle kai manzil se

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ye pahlaa ishq hai tumhaaraa soch lo
mire liye ye raastaa nayaa nahin

qatl karne kaa iraada hai magar sochtaa huun
tu agar aae to haathon mein jhijak paidaa ho

faasle aise bhi honge ye kabhi sochaa na thaa
saamne baiThaa thaa mere aur vo meraa na thaa

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye