phir mashiyyat se ulajhti hai miri divaangi — Hanif Fauq

main ne apni palkon par gham-kade sajaae hain
aarzu ke maatam mein sogvaar hasti hai

main teri jumbish-e-mizhgaan se kaanp jaataa hon
agarche dil ko gham-e-do-jahaan se Dar bhi nahin

kitni naadida bahaaron ki tamannaa-e-javaan
daaman-e-jaan mein mire aag lagaa deti hai

ik janam ke pyaase bhi sair hon to ham jaanein
yuun to rahmat-e-yazdaan chaar-su barasti hai

udaas raaton ki tirgi mein na koi taaraa na koi jugnu
kisi kaa naqsh-e-qadam hi chamke to nuur kaa e'tibaar aae

vaqt ki laash pe rone ko jigar hai kis kaa
kis janaaze ko liye ahl-e-nazar aate hain

shor din ko nahin sone detaa
shab ko sannaaTaa jagaa detaa hai

us ko sochun to dhyaan mein mere
khushbu aati hai pahli baarish ki

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

rok do ye raushni ki tez dhaar
meri miTTi mein gundhi hai raat bhi

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal