log andaaza lagaaeinge amal se mere — Heera Lal Falak Dehlvi

haal bimaar kaa puchho to shifaa milti hai
yaani ik kalma-e-pursish bhi davaa hotaa hai

tan ko miTTi nafas ko havaa le gai
maut ko kyaa milaa maut kyaa le gai

raushni tez karo chaand sitaaro apni
mujh ko manzil pe pahunchnaa hai sahar hone tak

mil ke sab amn-o-chain se rahiye
laantein bhejiye fasaadon par

miraa khat paDh liyaa us ne magar ye to bataa qaasid
nazar aai jabin par buund bhi koi pasine ki

apnaa ghar phir apnaa ghar hai apne ghar ki baat kyaa
ghair ke gulshan se sau darja bhalaa apnaa qafas

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

maarka garm to ho lene do khun-rezi kaa
pahle shamshir ke niche hamin jaa baiTheinge