daaman ko chaak kijiye is ehtiyaat se — Himayat Ali Shayar

tujh se vafaa na ki to kisi se vafaa na ki
kis tarah intiqaam liyaa apne aap se

taariki mein lipTi hui pur-haul khamoshi
is aalam mein kyaa nahin mumkin jaagte rahnaa

apne kisi amal pe nadaamat nahin mujhe
thaa nek-dil bahut jo gunahgaar mujh mein thaa

is jahaan mein to apnaa saaya bhi
raushni ho to saath chaltaa hai

main kuchh na kahun aur ye chaahun ki miri baat
khushbu ki tarah uD ke tire dil mein utar jaae

har taraf ik muhib sannaaTaa
dil dhaDaktaa to hai magar khaamosh

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

maarka garm to ho lene do khun-rezi kaa
pahle shamshir ke niche hamin jaa baiTheinge