koi to hogaa jis ko miraa intizaar hai — Ibrahim Ashk

zindagi apni musalsal chaahaton kaa ik safar
is safar mein baar-haa mil kar bichhaD jaataa hai vo

na dil mein koi gham rahe na meri aankh nam rahe
har ek dard ko miTaa sharaab laa sharaab de

ye aur baat hai ki barhana thi zindagi
maujud phir bhi mere badan par libaas thaa

kis liye katraa ke jaataa hai musaafir dam to le
aaj sukhaa peD huun kal teraa saayaa main hi thaa

nahin hai tum mein saliqa jo ghar banaane kaa
to 'ashk' jaao parindon ke aashiyaan dekho

bikhre hue the log khud apne vajud mein
insaan ki zindagi kaa ajab bandobast thaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

aisi hi intizaar mein lazzat agar na ho
to do ghaDi firaaq mein apni basar na ho

intizaar aur dastakon ke darmiyaan kaTti hai umr
itni aasaani se to baab-e-hunar khultaa nahin

hai khushi intizaar ki har dam
main ye kyuun puchhun kab mileinge aap

muntazir sab mire zavaal ke hain
mere ahbaab bhi kamaal ke hain