kyaa bataaun ki kitni shiddat se — Iftikhar Raghib

inkaar hi kar dijiye iqraar nahin to
uljhan hi mein mar jaaegaa bimaar nahin to

'raaghib' vo meri fikr mein khud ko bhi bhuul jaaein
aisi to koi baat nahin chaahtaa thaa main

ji chaahtaa hai jiinaa jazbaat ke mutaabiq
haalaat kar rahe hain haalaat ke mutaabiq

din mein aane lage hain khvaab mujhe
us ne bhejaa hai ik gulaab mujhe

le jaae jahaan chaahe havaa ham ko uDaa kar
TuuTe hue patton ki hikaayat hi alag hai

paDhtaa rahtaa huun aap kaa chehra
achchhi lagti hai ye kitaab mujhe

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

mohabbat aam saa ik vaaqia thaa
hamaare saath pesh aane se pahle

dhuaan detaa hai daamaan-e-mohabbat
in aankhon se koi aansu giraa hai

ab aur kyaa kahun main mohabbat ke baab mein
main un ke saath huun jo mohabbat ke saath hain

main ne ibaadaton ko mohabbat banaa diyaa
aankhein buton ke saath rahin dil khudaa ke saath